Қазақистанниң алмута вилайити пәнҗим йезисида уйғурлар билән қазақлар оттурисида тоқунуш йүз бәргән

Мухбиримиз әркин
2021-11-02
Share

27-Өктәбир күни қазақистанниң уйғурлар топлишип олтурақлашқан алмута вилайитигә қарашлиқ пәнҗим йезисида уйғурлар билән қазақлар оттурисида тоқунуш йүз берип, көп санда уйғур яшлири яриланған, бир қисим уйғурларниң өйлиригә от қоюветилгән, дуканларчеқиветилгән. Баш шитаби прагадики “азадлиқ радийоси” ниң хәвәр қилишичә, тоқунушни пәнҗимдики бир мәктәпниң уйғур оқуғучиси билән қазақ оқуғучиси арисида йүз бәгән җидәл кәлтүрүп чиқарған икән.

Бу қетимлиқ вәқә 2020-йили 2-айда қазақистанниң масәнчи йезисида йүз бәргән қазақлар билән туңганлар ‍оттурисидики тоқунуштин кейин рой бәргән йәнә бир қетимлиқ милләтләр тоқунушидур. Шу қетимлиқ тоқунушта 10 дәк адәм һаятидин айрилған. “явро-асия тори” ниң ейтишичә, бу тоқунушни туңганларниң яшанған бир қазақни урғанлиқиға даир миш-миш гәп кәлтүрүп чиқарған икән.

“азадлиқ радийоси” ниң хәвиридә, қазақистан йәрлик даирилириниң 28-өктәбир күни пәнҗим аһалисини йиғинға чақирғанлиқи, шундақла вәқәниң “етник тоқунуш” икәнликини рәт қилғанлиқи илгири сүрүлгән болсиму, әмма мәзкур йезидики аһалиләрдә кәйпиятниң йәнила җиддий икәнлики тәкитләнгән.

Икки оқуғучи арисидики шәхсий җидәлниң немә үчүн уйғурлар билән қазақлар арилишип олтурақлашқан бу йезида наһайити тезла етник сүркүлүшкә айлинип кәткәнликиниң сәвәби мәлум әмәс. Чәт әлдики бәзи уйғур таратқулириниң йәрлик уйғурлардин нәқил кәлтүрүп бәргән хәвәрлиридә қәйт қилинишичә, бу тоқунуш қазақистан 1991-йили мустәқил болғандин кейин уйғур елидин көчүрүп келип олтурақлаштурулған “оралман” дәп аталған қазақлар билән қазақистанниң йәрлик пуқралири болған уйғурлар оттурисида йүз бәргән икән. Илгири “оралман” лардин болған бәзи қазақлар алмута областиға қарашлиқ уйғур наһийәсиниң намини өзгәртишни тәләп қилғанлиқи игири сүрүлгән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт