Qazaqistanning almuta wilayiti penjim yézisida Uyghurlar bilen qazaqlar otturisida toqunush yüz bergen

Muxbirimiz erkin
2021.11.02
Share on WhatsApp
Share on WhatsApp

27-Öktebir küni qazaqistanning Uyghurlar topliship olturaqlashqan almuta wilayitige qarashliq penjim yézisida Uyghurlar bilen qazaqlar otturisida toqunush yüz bérip, köp sanda Uyghur yashliri yarilan'ghan, bir qisim Uyghurlarning öylirige ot qoyuwétilgen, dukanlarchéqiwétilgen. Bash shitabi pragadiki “Azadliq radiyosi” ning xewer qilishiche, toqunushni penjimdiki bir mektepning Uyghur oqughuchisi bilen qazaq oqughuchisi arisida yüz begen jidel keltürüp chiqarghan iken.

Bu qétimliq weqe 2020-yili 2-ayda qazaqistanning masenchi yézisida yüz bergen qazaqlar bilen tungganlar ‍otturisidiki toqunushtin kéyin roy bergen yene bir qétimliq milletler toqunushidur. Shu qétimliq toqunushta 10 dek adem hayatidin ayrilghan. “Yawro-asiya tori” ning éytishiche, bu toqunushni tungganlarning yashan'ghan bir qazaqni urghanliqigha da'ir mish-mish gep keltürüp chiqarghan iken.

“Azadliq radiyosi” ning xewiride, qazaqistan yerlik da'irilirining 28-öktebir küni penjim ahalisini yighin'gha chaqirghanliqi, shundaqla weqening “Étnik toqunush” ikenlikini ret qilghanliqi ilgiri sürülgen bolsimu, emma mezkur yézidiki ahalilerde keypiyatning yenila jiddiy ikenliki tekitlen'gen.

Ikki oqughuchi arisidiki shexsiy jidelning néme üchün Uyghurlar bilen qazaqlar ariliship olturaqlashqan bu yézida nahayiti tézla étnik sürkülüshke aylinip ketkenlikining sewebi melum emes. Chet eldiki bezi Uyghur taratqulirining yerlik Uyghurlardin neqil keltürüp bergen xewerliride qeyt qilinishiche, bu toqunush qazaqistan 1991-yili musteqil bolghandin kéyin Uyghur élidin köchürüp kélip olturaqlashturulghan “Oralman” dep atalghan qazaqlar bilen qazaqistanning yerlik puqraliri bolghan Uyghurlar otturisida yüz bergen iken. Ilgiri “Oralman” lardin bolghan bezi qazaqlar almuta oblastigha qarashliq Uyghur nahiyesining namini özgertishni telep qilghanliqi igiri sürülgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet