Bosiniye-gértségowinada Uyghurlarni qollash namayishi ötküzülgen

Bosiniye-gértségowinada Uyghurlarni qollash namayishi ötküzülgen.

Türkiyediki “Memliket” namliq tor gézitining xewer qilishiche, 12-yanwar küni bosniyening paytexti sarayéwoda köp sanda kishining qatnishishi bilen xitay hökümitining Uyghurlargha yürgüzüwatqan zulumlirigha naraziliq bildürüsh we Uyghurlarni qollash namayishi ötküzülgen.

Xewerde éytilishiche, mezkur namayishni xelq'araliq sarayéwo uniwérsitéti qarmiqidiki xelq'ara yashlar kulubi we milliy türk oqughuchilar birliki qatarliqlar hemkarliship uyushturghan iken. Paytext sarayéwodiki tarixiy meydan bolghan “Bashcharshi” da bashlan'ghan namayishta yashlar qollirida “Uyghurlargha erkinlik”, “Adaletsizlikke xatime”, “Uyghurlarni qutuldurunglar”, “Irqiy qirghinchiliqqa xatime bérilsun” dégendek sho'arlar yézilghan lozunkilarni kötürüp namayish qilghan. Namayishchi yashlar xitayning yighiwélish lagérlirigha qamalghan Uyghurlarning yalghuz emeslikini tekitligen.

Bosiniye-gértségowina 1992-yili sabiq yügüslawiye sotsiyalistik fédiratsiyesidin bölünüp chiqip musteqilliqini élan qilghan. Biraq dölettiki sirblarning buninggha qarshi chiqishi netijiside bosniye urushi partlighan we netijide bu dölette bosiniyelik musulmanlargha qarita irqiy qirghinchiliq yürgüzülgen. Irqiy qirghinchiliq herikiti netijide birleshken döletler teshkilati we shimaliy atlantik ehdi teshkilatining arilishishi hem bésimi netijiside 1995-yili dékabirda resmiy axirlashqan.

Tarixiy matériyallardin qarighanda, eyni chaghda sarayéwo qirghinchiliqida 10 ming, srébrénika qirghinchiliqida bolsa 8 ming bosniyelik musulman öltürülgen. Bu qirghinchiliqqa yétekchilik qilghan sérb général ratko miladéch “Urush jinayetchisi” dep élan qilinip, 2011 ‏-yili qolgha élin'ghan. B d t ning xagadiki xelq'ara sot mehkimisi 2017-yili uni muddetsiz qamaqqa höküm qilghan.