Pakistanning Uyghurlar diyaridiki ramizan cheklimisige süküt qilishi kishilerni ghezeplendürmekte

Pütün dunya musulmanliri ramizanliq pa'aliyetler bilen aldirash boluwatqanda Uyghurlarning öz wetinide ramizan rozisigha a'it pa'aliyetler bilen meshghul bolalmasliqi, jümlidin musulmanlargha ramizanning men'i qiliniwatqanliqi melum. Bu ehwaldin xewerdar bolghan musulmanlar dunyasida buninggha qarita ghezep chuqanliri barghanséri yuqiri pellige chiqmaqta.

“Asiyagha nezer” gézitining 20-may sanigha bésilghan mushu heqtiki maqalida körsitilishiche, pakistandiki musulmanlar jama'iti imran xan hökümitining Uyghurlar duch kéliwatqan ramizan cheklimiliri heqqide zuwan sürmey kéliwatqanliqini ghezep bilen eyiblimektiken. Pakistandiki ijtima'iy taratqularda pakistan hökümitining izchil islam dunyasidiki naheqchilikler üchün kökrek kérip otturigha chiqip kelgenlikini, emma nöwette pakistan hökümiti we ahalisining Uyghurlar duch kéliwatqan diniy cheklimiler heqqide dadil bolalmay qalghanliqini tenqidlesh mezmunidiki yazmilar köplep élan qilin'ghan.

Emma aptorning qarishiche, Uyghurlar diyaridiki ramizan cheklimisi keshmir yaki pelestindiki musulmanlar mesilisichilik omumi ghezepke aylinalmighan. Buningdiki bir muhim seweb pakistandiki hökümet axbaratliri bu heqte héchqandaq melumatlarni élan qilmighan. Yene kélip pakistan hökümiti eyni waqitta xelq'ara islam kéngishini xitay hökümitining Uyghurlargha qaratqan ramizan cheklimisini men'i qilishini tenqidlesh mezmunida qarar almasliqqa köndürgen. Iqtisadiy jehette xitayning “Bir belwagh bir yol qurulushi” arqiliq pakistan'gha salghan 62 milyard amérika dolliriliq meblighi bolsa buningdiki yadroluq amil bolup kelmekte iken.