Uyghur aptonom rayonidiki edliye tarmaqliri yighin échip, bir qatar orunlashturushlarni élip barghan

Muxbirimiz erkin
2019-11-11
Élxet
Pikir
Share
Print

Yéqinda Uyghur aptonom rayonluq yuqiri sot, yuqiri teptish mehkimisi, edliye nazariti we j x nazariti yighin chaqirip, xitay kompartiyesining bash sékrétari shi jinpingning 4‏-omumi yighinda qilghan sözlirini qandaq emeliyleshtürüshni muzakire qilghan.

"Shinjang géziti" ning xewer qilishiche, yighinda shi jinpingning sözini rayondiki sot, teptish, edliye we j x organlirida qandaq ijra qilish heqqide bir qatar orunlashturushni élip barghan. Lékin xewerde bu xil orunlashturushning konkrét tepsilati tilgha élinmighan. Xewerde bayan qilinishiche, aptonom rayonluq yuqiri sotning 6‏-noyabir küni échilghan yighinida "Tötni tonush" ni kücheytish, "Tötke bolghan ishenchide ching turush", "Ikkini qoghdash" ni ishqa ashurush tekitlinip, emeliy herikette "Ünümdarliq" ni kücheytish telep qilin'ghan.

Aptonom rayonluq yuqiri teptish mehkimisining shu küni échilghan yighinida aptonom rayonluq partkomning alaqidar orunlashturushini emeliyleshtürüsh, partiyening yétekchilikini kücheytish, pen-téxnikaning sistémidiki rolini kücheytish qatarliqlar tekitlen'gen.

Xitay kompartiyesi merkizi komitétining 4‏-nöwetlik omumiy yighini 31‏-öktebir béyjingda échilghan. Yighinda xitay kompartiyesining bash sékrétari shi jinping nöwette xitay duch kéliwatqan ichki-tashqi weziyetke qarita bir qatar orunlashturush élip barghan. Bu qétimqi yighin amérika-xitay soda urushi partlap, xitay iqtisadi éghir xirisqa duch kelgen shundaqla xitayning Uyghur rayonida 3 milyondek musulmanni lagérlargha qamap, ularning medeniyiti, diniy, tili we örp-adetlirini mejburiy xitaychilashturushi xelq'arada qattiq naraziliqqa uchrawatqan bir mezgilde échilghan idi.

Rayondiki edliye tarmaqlirining bu qétimqi yighinida nöwettiki bu weziyetke qarita qandaq orunlashturushni élip barghanliqi ashkarilanmighan bolsimu, lékin közetküchiler xitay edliye tarmaqlirining lagérdiki 3 milyondek musulmanning tutqun qilinishigha qarita her xil qanuniy bahanilerni izdeshke tirishiwatqanliqini ilgiri sürmekte.

Toluq bet