Ma shingrüy Uyghur rayonini xitayning énérgiye, éléktir we qézilma bayliqlar bixeterlikige kapaletlik qilishtiki bazigha aylandurushqa wede bergen

Xitay hökümiti Uyghur élini xitayning énérgiye we muhim qézilma bayliqlargha kapaletlik qilishtiki bazisigha aylandurmaqchi.

Xitayning “Tengritagh tori” ning xewirige qarighanda, yéqinda Uyghur aptonom rayonluq partkomning sékrétari ma shingrüy bilen Uyghur aptonom rayonining re'isi erkin tuniyaz qatarliqlar xitayning Uyghur éligha jaylashqan merkez karxaniliridin xitay döletlik énérgiye guruhi we xitay döletlik éléktir tori shirkitini ziyaret qilghan, ma shingrüy u yerde qilghan sözide, xitayning énérgiye, éléktir we muhim qézilma bayliqlar bixeterlikige kapaletlik qilidighanliqi heqqide wede bergen.

U mundaq dégen: “Shinjang bash sékrétar shi jinping we partiye merkizi komitéti tapshurghan ‛besh istratégiyelik orun‚ ni mehkem baghlap, énérgiye bayliqining ewzellikini özgertishni ilgiri sürüsh üchün, téximu köp küch serp qilidu. Döletning énérgiye we muhim qézilma bayliqlarning bixeterlikige kapaletlik qilish üchün téximu aktip xizmet qilidu. Yuqiri süpetlik rayon tereqqiyatini ilgiri sürüshni tézlitidu. Shinjang, döletlik énérgiye guruhi we döletlik éléktir tori shirkiti bilen bolghan hemkarliqni téximu chongqurlashturup, ela süpetlik kömür ishlepchiqirish iqtidarini ashurup, kömür toshush ul eslihe qurulushini tézlitidu, shinjangning kömür éksportining éshishi we ünümini ilgiri süridu. ”

Xitay hökümiti ötken yil kirgendin buyan Uyghur élide énérgiye ishlepchiqirishini öz ichige alghan “8 Chong kespiy ishlepchiqirish topi” ni yolgha qoyghan idi. U, néfit tebi'iy gaz ishlepchiqirish, pishshiqlap ishlesh, éléktir, kömür ximiye sana'iti, paxta toqumichiliq, kiyim-kéchek, ashliq, méwe-chiwe ishlepchiqirish qatarliqlarni öz ichige alidu. Bu sahelerning mutleq köp qismining Uyghur mejburiy emgiki we éghir muhit bulghinishi bilen biwasite munasiwetlik ikenliki chet ellerdiki kishilik hoquq organlirining tenqidige duch kelgen.

Halbuki, ma shingrüy xitayning döletlik éléktir énérgiyesi yetküzüsh we kontrol qilish merkizide qilghan sözide, “Shinjangdiki kömür bayliqini neq meydanda éléktir we gazgha aylandurushni tézlitip, kesip kölimini dawamliq kéngeytimiz, shinjang tokini ichkirige yetküzüsh kölimini dawamliq kéngeytip, döletke téximu yaxshi mulazimet qilimiz” dégen.