"америка һәмбәһирлики" торида америкадики уйғур ресторанлириниң дипломатик роли тонуштурулған

Мухбиримиз җәвлан
2020-12-16
Share

Америка ташқи ишлар министирлиқиниң диний әркинлик, қанун, иқтисад, кишилик һоқуқ мәсилилири муһакимә мунбири болған "америка һәмбәһирлики" торида 15-декабир елан қилинған бир мақалидә уйғур ресторанлириниң пәқәт йемәк-ичмәк тиҗарити билән шуғуллинидиған мулазимәт орунлири болуп қалмай, өз нөвитидә йәнә уйғур мәдәнийити вә уйғурларниң нөвәттики әһвалини тонуштуридиған бир көзнәк икәнлики баян қилинған.

"ресторан һәр даим өзгичә мәдәнийәт билән тонушушниң башлиниш нуқтисидур" дегән җүмлә билән башланған бу мақалидә, лос анжелис районидики долан уйғур ресторани билән вашингтон районидики долан уйғур ресторани тонуштурулған һәмдә бу ресторан хоҗайинлириниң аилиси дуч кәлгән паҗиәләрни чөридигән асаста нөвәттики уйғур вәзийитиниң нәқәдәр қорқунчлуқ һалға келип қалғанлиқи йорутуп берилгән.

Мақалидә ейтилишичә, бу рестуранниң хоҗайинлири һәр милләт, һәр саһәдин болған херидарларға мулазимәт қилиш биләнла қалмай, уларға хитай компартийәсиниң нәччә он йилдин буян уйғурларға йүргүзүп келиватқан зулумини аңлитип кәлгән. Лос анжелистики долан рестораниниң хизмәтчилири алди тәрипигә "Google Uyghurs", арқа тәрипигә "Closethecamps#" (лагерларни тақа) дегән һәштәг чүшүрүлгән иш кийими кийип мулазимәт қиливатқан болуп, мушу шәкил билән америка пуқралириға уйғурлар учраватқан зулумни билдүридикән, соаллириға җаваб беридикән.

Уйғур ресторанлири әмәлийәттә уйғур таамлиринила әмәс, мәлум дәриҗидә уйғур мимарлиқи, уйғур безәкчилики, уйғур гүзәл сәнити вә уйғур нахша-музикилирини сиртқа намаян қилидиған көзнәк болуп, бу мақалидә йәнә уйғур ресторанлириниң нөвәттә уйғур диярида хитай тәрипидин йоқитилиш хәвпигә дуч кәлгән уйғур мәдәнийитини сақлап келиватқанлиқиму алаһидә тәкитләнгән. Уйғур таамлириниң һиндистан, оттура шәрқ, түркийә, оттура асия таам мәдәнийитини өзигә муҗәссәмлигән, кавап, ләңмән, полу қатарлиқ ләззәтлик таамлири билән америкада тонулуватқан йеңичә мәдәнийәт һадисиси икәнликиму тилға елинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт