"Amérika hembehirliki" torida amérikadiki Uyghur réstoranlirining diplomatik roli tonushturulghan

Muxbirimiz jewlan
2020-12-16
Share

Amérika tashqi ishlar ministirliqining diniy erkinlik, qanun, iqtisad, kishilik hoquq mesililiri muhakime munbiri bolghan "Amérika hembehirliki" torida 15-dékabir élan qilin'ghan bir maqalide Uyghur réstoranlirining peqet yémek-ichmek tijariti bilen shughullinidighan mulazimet orunliri bolup qalmay, öz nöwitide yene Uyghur medeniyiti we Uyghurlarning nöwettiki ehwalini tonushturidighan bir köznek ikenliki bayan qilin'ghan.

"Réstoran her da'im özgiche medeniyet bilen tonushushning bashlinish nuqtisidur" dégen jümle bilen bashlan'ghan bu maqalide, los anzhélis rayonidiki dolan Uyghur réstorani bilen washin'gton rayonidiki dolan Uyghur réstorani tonushturulghan hemde bu réstoran xojayinlirining a'ilisi duch kelgen paji'elerni chöridigen asasta nöwettiki Uyghur weziyitining neqeder qorqunchluq halgha kélip qalghanliqi yorutup bérilgen.

Maqalide éytilishiche, bu résturanning xojayinliri her millet, her sahedin bolghan xéridarlargha mulazimet qilish bilenla qalmay, ulargha xitay kompartiyesining nechche on yildin buyan Uyghurlargha yürgüzüp kéliwatqan zulumini anglitip kelgen. Los anzhélistiki dolan réstoranining xizmetchiliri aldi teripige "Google Uyghurs", arqa teripige "Closethecamps#" (lagérlarni taqa) dégen heshteg chüshürülgen ish kiyimi kiyip mulazimet qiliwatqan bolup, mushu shekil bilen amérika puqralirigha Uyghurlar uchrawatqan zulumni bildüridiken, so'allirigha jawab béridiken.

Uyghur réstoranliri emeliyette Uyghur ta'amlirinila emes, melum derijide Uyghur mimarliqi, Uyghur bézekchiliki, Uyghur güzel sen'iti we Uyghur naxsha-muzikilirini sirtqa namayan qilidighan köznek bolup, bu maqalide yene Uyghur réstoranlirining nöwette Uyghur diyarida xitay teripidin yoqitilish xewpige duch kelgen Uyghur medeniyitini saqlap kéliwatqanliqimu alahide tekitlen'gen. Uyghur ta'amlirining hindistan, ottura sherq, türkiye, ottura asiya ta'am medeniyitini özige mujessemligen, kawap, lengmen, polu qatarliq lezzetlik ta'amliri bilen amérikada tonuluwatqan yéngiche medeniyet hadisisi ikenlikimu tilgha élin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet