Uyghur aptonom rayon da'iriliri saqchi qoshuni qurulushini kücheytidiken

Muxbirimiz jüme
2017-05-27
Élxet
Pikir
Share
Print

Uyghur élide saqchilar hedep köpeytiliwatqan bir mezgilde, Uyghur aptonom rayon da'iriliri jem'iyet muqimliqi we uzun mezgillik eminlikni ishqa ashurush üchün saqchi qoshuni qurulushini yene kücheytidighanliqini bildürgen.

"Tengritagh tori" ning xewer qilishiche, bular 26-may chén chüen'go riyasetchilik qilghan Uyghur aptonom rayonluq partkomining da'imiy hey'etler yighinida otturigha qoyulghan.

Melumatlargha qarighanda, mezkur pilan xitay re'isi "Shi jinpingning memliketlik j x sistémisidiki atalmish nemunichilarni teqdirlesh yighinigha qatnashqan wekiller bilen körüshkende qilghan sözining rohi" gha asasen yolgha qoyulidiken.

Xewerde mundaq déyilgen: "J x xizmiti we j x qoshuni qurulushini üzlüksiz ilgiri sürüshni yéngi baldaqqa kötürüp, ijtima'iy muqimliqni qoghdashtiki xizmetlerni puxta ishlesh kérek."

Bu qétim da'iriler otturigha qoyghan "Saqchi qoshuni qurulush qurulushini ilgiri sürüsh" pilaning yene saqchi köpeytishidin dérek béridighan yaki bermeydighanliqi xewerde konkrétni sherhlenmigen.

Xitay da'iriliri ötken yilining axiridin buyan Uyghur élide saqchi we yardemchi saqchilarni hessilep köpeytishke bashlighan idi.

Aqtu nahiyisi téxi ötken ayda omumiy uqturush chiqirip, xitay ölkiliridin yuqiri ma'ash bilen 600 neper saqchi qobul qilidighanliqini bildürgen bolsa, yéqinda xotenning kériye, chira we lop nahiyeliri shundaqla qizilsuning atush shehiride yéngidin qobul qilin'ghan nechche yüzligen yardemchi saqchining jiddiy meshqlendürülüwatqanliqi melum bolghan idi.

Uningdin bashqa xotenning guma nahiyesidimu 200 neper yardemchi saqchining qobul qilinip, herqaysi saqchixanilargha seplen'genliki ilgiri sürülgen.

Toluq bet