Amérika mutexessisi xelq'araliq bésim arqiliq xitayning Uyghur siyasitini özgertishini tekitlidi

Muxbirimiz irade
2019-03-05
Élxet
Pikir
Share
Print

Amérikadiki tonulghan xitay ishliri tetqiqatchisi, siyaset proféssori jun tifel dirayir tashqi siyaset institutining tor bétide Uyghurlarning weziyiti heqqide bir tepsiliy maqale élan qilghan. U maqalisige, "Heqiqiy aptonomiye bolmighan shinjang Uyghur aptonom rayoni-xelq'araliq kishilik hoquq setchiliki we bir belwagh bir yol qurulushidiki egri-toqayliqlar" dep mawzu qoyghan.

U maqaliside, Uyghurlarning yéqin zaman tarixidin yeni xitay hakimiyitining bashqurushigha ötken tarixliridin qisqiche melumat bergen we Uyghurlarning shundin buyan izchil halda xitayning assimilyatsiye siyasitining zerbisige uchrap kelgenlikini we netijide bu zulum tedrijiy éship 2017-yili nopusning 10-11 pirsentining lagérlargha qamalghanliqini bayan qilghan.

Aptorning eskertishiche, Uyghur élidiki weziyet, lagérlarning mewjut yaki emeslikini munazire qilishtin alliburun halqip ketken bolup, nöwettiki jiddiy mesile bolsa lagér mesiliside néme qilish kérek? dégendin ibaret iken. Aptorning qarishiche, xitay hökümitining Uyghur élidiki siyasitini yumshatmaydighanliqini nezerde tutqanda, uninggha taqabil turushning ünümlük usuli xelq'araliq jama'et pikri arqiliq bésim ishlitish iken. U buning üchün, aldi bilen gherb ellirige tewe shirketlerge shi jinpingning bésim siyasitige herqandaq yosunda wasite bolmasliq heqqide bésim kücheytilishi kéreklikini bildürgen we bajir tenterbiye kiyimliri shundaqla térmo fishir pen-téxnika shirketlirining weqelirini buning bir yaxshi netijisi, dep körsetken.

Jun tifel dirayir xanim yene Uyghur élidiki siyasetliri seweblik xitayning bir belwagh bir yol qurulushi istratégiyesiningmu közligen meqsetlirige yétishte qiyinchiliqqa chüshüshi mumkinlikini, chünki uning qiliwatqanlirining "Bir belwagh bir yol qurulushi" teshwiq qiliwatqan "Ochuqluq we rawanliq, ortaq tereqqiyat" rohigha mas kelmeydighanliqini ipade qilghan.

Jun tifel dirayir xanim ilgiri amérika dölet mejlisi qarmiqidiki xitay ishliri komitétida meslihetchi bolupmu ishligen bolup, uning xitay heqqide élan qilghan bir qanche parche muhim kitabliri bar.

Toluq bet