Xitay hökümiti Uyghur sotining hökümini inkar qilip mektup yollidi

Muxbirimiz eziz
2021.12.29

En'gliyening london shehiridiki Uyghur sot kollégiyesi birnechche qétimliq guwahliq yighinliridin kéyin “Xitay hökümiti Uyghurlarni qirghin qiliwatidu” dégen mezmunda axirqi hökümni élan qilghanidi. Shuningdin kéyin shu qétimliq sot yighinlirida guwahliq bergen kishilerning biri, sheffiyld uniwérsitétining proféssori déywid tobin en'gliyediki eng chong xewer agéntliqlirining biri bolghan “Shotlandiyelikler” gézitide obzor maqalisi élan qilip, Uyghur diyaridiki qirghinchiliqni ixcham bayan qilip bergenidi.

29-Dékabir küni xitayning édinburgdiki konsuli ma chyang “Shotlandiyelikler” gézitige mektup yollap, ularning “Yalghanchiliq bilen tolghan” ashundaq bir maqalini élan qilghanliqigha naraziliq bildürgen. Mezkur gézitte élan qilin'ghan ochuq mektupta ma chyang “Kespiy terbiyelesh merkezliri” ning térrorluq we ashqunluqning aldini élishta muhim rol oynighanliqini, shuningdek namratliqni tügitip inaqliqni emelge ashurghanliqini alahide tekitligen. Shuningdek “Xuddi re'is shi jinping körsitip ötkendek hazir shinjangdiki her millet xelqi anarning danisidek zich ittipaqliqta yashimaqta” dégen.

“Shotlandiyelikler” géziti mezkur ochuq mektupqa biwasite jawab bérish ornigha uni öz gézitide élan qilghan hemde bu heqtiki so'allarni jama'etke hawale qilghan. Melum bolushiche, xitay hökümiti eyni waqitta lagérlarning mewjutluqini qet'iy inkar qilghan bolup, kéyinche taghdek pakitlar aldida bu jaylarning lagér emes, belki “Kespiy terbiyelesh merkizi” ikenlikini étirap qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.