Хитай әнгилийә һөкүмитидин "уйғур сот коллегийәси" ни тохтитишни тәләп қилған

Мухбиримиз әркин
2021-09-13
Share

Хитай дипломатик қаналлири арқилиқ әнгилийә һөкүмитидин 10-сентәбир күни башлинип 13-сентәбиргә қәдәр давамлашқан лондон "уйғур сот коллегийәси" ни тохтитишни тәләп қилған. Мәлум болушичә, хитайниң әнгилийәдә турушлиқ баш әлчиси җең зегуаң хитайниң дипломатик қанал арқилиқ әнглийә һөкүмитигә бесим ишләткәнликини ашкарлиған.

"уйғур сот коллегийәси" ниң 2-басқучлиқ гуваһлиқ аңлаш йиғинида адвокатлар, мутәхәсиссләр, тәтқиқатчилар, паалийәтчиләр вә шаһитлар гуваһлиқ бәргән.

Хитай һөкүмити "уйғур сот коллегийәси" ни "ялғанчилиқ" билән әйибләп, уни хитайға қарши күчләрниң "сиясий оюни" дегән. Хитай һөкүмити гәрчә бу сотқа пәрва қилмайдиғандәк бир көрүнүш һасил қилишқа урунған болсиму, бирақ мәзкур сотниң хитайни қаттиқ биарам қилғанлиқи, хитайниң дипломаттик қанал арқилиқ "уйғур сот коллегийәси" ни тақашни тәләп қилғанлиқи мәлум болди.

Хитайниң әнгилийәдики баш әлчиси җең зегуаң хитайниң әнгилийәгә бесим ишләткәнликини "сумруғ" телевизийә қанилиниң суаллириға җавап бәргәндә ашкарлап қойған. У: "шуниң үчүн биз уларниң тәдбир қоллинип, мәзкур сотни уюштурғучиларниң бу хил яман ғәрәзлик һәрикәтлирини тохтитишини тәләп қилдуқ," дегән.

Униң ейтишичә, әнгилийә һөкүмити өзлириниң бу сот билән алақиси йоқлиқи, бу сотниң ғәйри һөкүмәт характерлик вә қануний мәҗбурлаш күчи йоқ икәнликини билдүргән. Хитай һөкүмити "уйғур сот коллегийәси" гә "яман ғәрәзлик һәрикәт" дәп һуҗум қиливатқан болсиму, бирақ "уйғур сот коллегийәси" 12-сентәбир җең зегуаңға мәктуп йезип, хитайниң мәзкур сотқа қатнишишини тәклип қилған. Мәктупта әгәр хитайға қаритилған әйибләшләр "төһмәт" болидиған болса, хитай вәкиллириниң сотқа келип, соттики гуваһлиқларниң "төһмәт" икәнликигә даир дәлилләрни оттуриға қоюшини тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт