Xitay en'giliye hökümitidin "Uyghur sot kollégiyesi" ni toxtitishni telep qilghan

Muxbirimiz erkin
2021-09-13
Share

Xitay diplomatik qanalliri arqiliq en'giliye hökümitidin 10-séntebir küni bashlinip 13-séntebirge qeder dawamlashqan london "Uyghur sot kollégiyesi" ni toxtitishni telep qilghan. Melum bolushiche, xitayning en'giliyede turushliq bash elchisi jéng zégu'ang xitayning diplomatik qanal arqiliq en'gliye hökümitige bésim ishletkenlikini ashkarlighan.

"Uyghur sot kollégiyesi" ning 2-basquchliq guwahliq anglash yighinida adwokatlar, mutexesissler, tetqiqatchilar, pa'aliyetchiler we shahitlar guwahliq bergen.

Xitay hökümiti "Uyghur sot kollégiyesi" ni "Yalghanchiliq" bilen eyiblep, uni xitaygha qarshi küchlerning "Siyasiy oyuni" dégen. Xitay hökümiti gerche bu sotqa perwa qilmaydighandek bir körünüsh hasil qilishqa urun'ghan bolsimu, biraq mezkur sotning xitayni qattiq bi'aram qilghanliqi, xitayning diplomattik qanal arqiliq "Uyghur sot kollégiyesi" ni taqashni telep qilghanliqi melum boldi.

Xitayning en'giliyediki bash elchisi jéng zégu'ang xitayning en'giliyege bésim ishletkenlikini "Sumrugh" téléwiziye qanilining su'allirigha jawap bergende ashkarlap qoyghan. U: "Shuning üchün biz ularning tedbir qollinip, mezkur sotni uyushturghuchilarning bu xil yaman gherezlik heriketlirini toxtitishini telep qilduq," dégen.

Uning éytishiche, en'giliye hökümiti özlirining bu sot bilen alaqisi yoqliqi, bu sotning gheyri hökümet xaraktérlik we qanuniy mejburlash küchi yoq ikenlikini bildürgen. Xitay hökümiti "Uyghur sot kollégiyesi" ge "Yaman gherezlik heriket" dep hujum qiliwatqan bolsimu, biraq "Uyghur sot kollégiyesi" 12-séntebir jéng zégu'anggha mektup yézip, xitayning mezkur sotqa qatnishishini teklip qilghan. Mektupta eger xitaygha qaritilghan eyibleshler "Töhmet" bolidighan bolsa, xitay wekillirining sotqa kélip, sottiki guwahliqlarning "Töhmet" ikenlikige da'ir delillerni otturigha qoyushini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet