Uyghur élide “Jungyi tébabiti dorigerlikini kücheytip, shinjangni medeniyet arqiliq ozuqlandurush” tekitlen'gen

Washin'gtondin muxbirimiz irade teyyarlidi
2024.05.16

Uyghur aptonom rayonluq hökümet 15-may küni, ürümchide “Jungyi tébabiti dorigerlikini yuqiri süpetlik tereqqiy qildurush yighini” chaqirghan. Yighinda “Jungyi tébabiti dorigerlikini kücheytip, shinjangni medeniyet arqiliq ozuqlandurush” tekitlen'gen. Shu küni yighinda yene atalmish “Aptonom rayonluq jungyi tébabiti dorigerlikini bashqurush idarisi” ning yopuqini échish murasimimu ötküzülgen.

Xitayche “Tengritagh” torining bu heqtiki xewiridin qarighanda, Uyghur rayonluq partkomning sékrétari ma shingrüy we Uyghur rayonluq hökümetning re'isi erkin tuniyazlar bu yighin'gha qatniship, “Xitay tébabiti medeniyitini zor küch bilen ewj aldurup, shinjangni medeniyet arqiliq ozuqlandurushtiki rolini yenimu jari qildurush kérek” dégen yolyoruqlarni bergen.

Xitay da'iriliri yéqinqi yillardin buyan Uyghurlarning tili, dini, ma'aripi we milliy örp-adetlirini yoqitish xaraktérlik assimilyatsiye siyasetlirini “Shinjangni medeniyet arqiliq ozuqlandurush” dep atap kelgen idi؛ emdilikte bu atalghuni “Xitay tébabiti dorigerlikini Uyghur rayonida rawajlandurush” üchün qollinishi diqqet qozghimaqta.

Bu heqte radiyomiz muxbiri igiligen uchurlarda, xitay da'irilirining Uyghurlarning özige xas bolghan we az dégende 2500 yilliq uzun tarixqa ige bolghan en'eniwi “Uyghur milliy tébabiti” ni xitay tébabetchilikining bir qismidek körsitishke urunuwatqanliqi melum bolghanidi. Bu qétim da'irilerning mexsus yighin chaqirip, xitay tébabiti dorigerlikini rawajlandurushni tekitlishi hemde buni axbarat wasitiliride teshwiq qilishi medeniyet assimilyatsiyesi herikitining küchiyishidin dérek bermekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.