Хитай хәлқараниң уйғур диярида мустәқил тәкшүрүш елип беришиға йол қоймайдиғанлиқини билдүргән

Мухбиримиз әркин
2020-08-03
Елхәт
Пикир
Share
Принт

Хитай хәлқараниң уйғур диярида мустәқил тәкшүрүш елип беришиға йол қоймайдиғанлиқини билдүргән. Хитай даирилириниң тәкитлишичә, улар мустәқил тәкшүрүшниң адил болушиға ишәнмәйдикән. Бу, хитай даирилириниң тунҗи қетим немә үчүн хәлқараниң уйғур диярида мустәқил тәкшүрүш елип бериш тәләплирини изчил рәт қилип келиватқанлиқиға чүшәнчә беришидур. Хитай «йәршари вақти» гезитиниң 2-авғуст хәвәр қилишичә, хитай хәлқара мустәқил көзәткүчиләрниң шинҗаң уйғур аптоном районида кишилик һоқуқ тәкшүрүши елип беришиға йол қоймайдикән.

Хәвәрдә, бу «бәзи дөләтләрниң өзидин пәрқлиқ болған дөләтләрни бесиштики бир хил тузақ» икәнлики, униң «адаләт елип кәлмәй, иғвани техиму авутидиғанлиқи» тәкитләнгән. «Йәршари вақти» гезитиниң тәкитлишичә, хитайниң фирансийәдә турушлуқ әлчиханиси фирансийә ташқи ишлар министири ле дәриянниң бу һәқтики чақириқиға 2-авғуст күни қайтурған инкасида бу баһанини көрсәткән. Ле дәриян өткән һәптә б д т ниң уйғур диярида тәкшүрүш елип беришини тәләп қилған.

У өткән һәптә фирансийә парламент әзалириға сөз қилип, «улар(хитай) мениң сөзлиримни асассиз дегән болса, биз б д т кишилик һоқуқ алий комиссари мишел башилейниң һәмраһлиқида мустәқил хәлқара көзәткүчиләрни әвәтишни тәклип қилимиз» дегәниди. Лекин «йәршари вақти» гезитиниң тәкитлишичә, хитай әлчиханиси бу һәқтики баянатида, «ялғанчилиқ асасидики аталмиш'хәлқара мустәқил тәкшүрүш‹ниң адаләт елип кәлмәйдиғанлиқи», «бәлки иғвани техиму авутидиғанлиқи вә униңға техиму илһам беридиғанлиқи» ни илгири сүргән. Көзәткүчиләрниң тәкитлишичә, әгәр хитайниң йошуридиған нәрсиси болмиса, хәлқара мустәқил көзәкүчиләрниң районда тәкшүрүш елип беришиға йол қояттикән.

Пикирләр (0)
Share
Толуқ бәт