Xitayning tenterbiyege mes'ul emeldari, shinjanggha tenterbiyediki nishanliq yardemning “Jungxu'a milliti ortaq éngi” gha xizmet qilishini telep qilghan

Xitayning Uyghur diyarida “Jungxu'a milliti ortaqgewdisi éngi” berpa qilish namidiki xitaylashturush pilanini tenterbiye arqiliqmu emeliyleshtürüshi telep qilinmaqta.

Xitayning tenterbiye ishlirigha mes'ul aliy emeldari, 13-iyun küni Uyghur diyarining ghulja shehride ötküzülgen “Shinjanggha tenterbiyede nishanliq yardem bérish xizmet yighini” da, xitay tenterbiye sistémisining shinjanggha nishanliq yardem bérishi “Choqum jungxu'a milliti ortaq gewdisi éngi berpa qilishni asasi chiqish nuqtisi qilishi kérekliki” ni telep qilghan. Xitay taratqulirining bildürüshiche, Uyghur aptonom rayonining re'isi erkin tunyazmu qatnashqan bu yighinda, xitay döletlik tenterbiye idarisining bashliqi we partiye sékrétari gaw jiden yuqiriqi telepte bolghan. Uning körsitishiche, xitayning memliketlik tenterbiye sistémisi we Uyghur diyaridiki her qaysi organlar “Choqum partiyening yéngi dewridiki shinjangni bashqurush istratégiyesini toluq, toghra we estayidil emeliyleshtürüshi kérek” iken.

Xitay da'irilirining Uyghur diyaridiki barliq ishlarda “Jungxu'a milliti ortaq gewdisi éngi berpa qilish” ni chiqish nuqtisi qiliwatqanliqi melum bolsimu, biraq bu tunji qétim xitayning tenterbiyege mes'ul bir aliy emeldarining Uyghur diyarigha tenterbiyede nishanliq yardem bérishtimu “Jungxu'a milliti ortaq éngi” ni chiqish qilishni tekitlishidur. Halbuki, xitayning Uyghur diyarida “Jungxu'a milliti ortaq gewdisi éngi berpa qilish” siyasitining Uyghur diyarini xitaylashturup, Uyghurlarni assimilyatsiye qilishni chiqish qilghanliqi qeyt qilinmaqta.

Uyghur aptonom rayonluq partkomning zuwani bolghan “Shinjang géziti” ning 14-iyun bergen xewiridin melum bolushiche, yighinda gaw jiden “Tenterbiyede shinjanggha nishanliq yardem bérishning qimmetlik tejribe-sawaqlirini yekünlesh” ni telep qilghan. U “Choqum bashtin-axir jungxu'a milliti ortaq gewdisi éngi berpa qilishni asasiy chiqish nuqtisi qilip, choqum tenterbiyening ‛töt iqtidari‚ ni tetbiqlishimiz…tenterbiyede shinjanggha nishanliq yardem bérish méxanizmini normallashturup shinjang ammiwi tenterbiyesining tereqqiyatini qollishimiz, bu arqiliq shinjangni medeniyet arqiliq ozuqlandurushqa hemdemde bolushimiz kérek” dégen.