Уйғур ели билән тибәттики хитай хәвпсизлик қисимлириниң һәрбий алақисини күчәйтиши диққәт қозғимақта

Мухбиримиз ирадә
2019-01-23
Елхәт
Пикир
Share
Принт

Уйғур елида турушлуқ хитай хәвпсизлик қиисмлири нөвәттә тибәт қатарлиқ башқа чегра район хәвпсизлик қисимлири билән болған һәрбий һәмкарлиқини җиддий күчәйтмәктикән.

«Хәлқара тибәт һәрикити» ниң хәвәр қилишичә, уйғур елида турушлуқ хитай дөләт хәвпсизлики қисимлири билән чиңхәй өлкилик хәвпсизлик қиисмлири чегра районларда бир қанчә қетим бирләшмә һәрбий мәшиқ елип барған болуп, бу әһвал юқириқи бу икки райондики қамалниң йәниму артидиғанлиқидин дерәк беридикән.

Хитайниң һөкүмәт таратқулири бу һәқтә тарқатқан хәвиридә бу һәрбий мәшиқләрниң хитай тилида «чийәнтаң» тәбиий райони вә уйғур елиниң чиңхәй билән чигралинидиған алтун тағ тәбиий райони қатарлиқ 3 чегра районда елип берилғанлиқини вә бу мәшиқләрдә йеңи түрдики учқучисиз айропиланларниң синақ қилинғанлиқини билдүргән.

Мәлум болушичә, уйғур вә чиңхәй өлкисидики хәвпсизлик қисимлири үчүн тибәтчидә «гари» дәп атилидиған чегра районида мәхсус бир һәрбий мәшиқ райони тәсис қилинғандин башқа, бу тәбиий районларға һәрқандақ бир гуруппа вә шәхсиниң киришиму қәтий чәклинидикән.

«Хәлқара тибәт һәрикити» ниң хәвиридә мулаһизә қилишичә, юқириқи бу 3 тағлиқ чегра районда бихәтәрлик тәдбирлириниң күчәйтилиши уйғур ели вә тибәт районлириниң йәниму илгирилигән һалда қамал қилинғанлиқи вә бундин кейин чегра атлап хитайдин чиқип кетишиниң имкансиз һалға кәлгәнликидин дерәк беридикән.

Техи йеқинда уйғур ели даирилири ниңшя туңган аптоном райони биләнму аталмиш «террорлуққа қарши туруш һәмкарлиқ келишими» имзалап, икки район арисидики хәвпсизлик һәмкарлиқини күчәйтмәкчи болған иди.

Пикирләр (0)
Share
Толуқ бәт