Билл гертс: «хитай һөкүмити уйғур вә тибәтләрни һуҗум нишани қилған биологийәлик қоралларни тәҗрибә қилмақта»

Мухбиримиз әркин
2020-05-18
Елхәт
Пикир
Share
Принт

«Вашингтон вақти» гезитиниң мухбири бил гертс 16-май күни «америка садаси хәвәрлири» намлиқ консерватип таратқуниң зияритини қобул қилип, хитайниң уйғур вә тибәтләрни һуҗум нишани қилған бийологийәлик қоралларни тәҗрибә қиливатқанлиқини илгири сүргән.

Билл гертсниң тәкитлишичә, трамп һөкүмитидики хитайниң мәзкур программисиға алақидар истихбарат учурлиридин хәвәрдар затлар униңға «хитайниң уйғур, тибәт вә башқа аз санлиқ милләтләргә охшаш мәлум бир етник топни һуҗум нишани қилған бийологийәлик қоралларни тәрәққий қилдуруватқанлиқиға аит ениқ йеңи истихбарат учурлири барлиқи» ни билдүргән.

Буниң алдида билл гертс бу хәвәрни 14-май күни «вашингтон вақти» гезитидә елан қилған. У хәвәрдә бу учурни трамп һөкүмитидики юқири дәриҗилик бир әмәлдарниң тәминлигәнликини, униң «биз хитайниң аз санлиқ милләтләргә қаритилған йошурун бийологийәлик қораллар тәҗрибисигә диққәт қиливатимиз» дегәнликини тәкитлигән иди. «Вашингтон вақти» гезитиниң хәвири һазирға қәдәр техи тәрәпсиз мәнбәәләр тәрипидин дәлилләнмиди. Лекин көзәткүчиләрниң илгири сүрүшичә, бу хитайниң уйғурларға қарита бийологийәлик қоралларни тәҗрибә қилғанлиқиға даир гуманларниң тунҗи қетим оттуриға қоюлуши әмәс икән.

Сабиқ совет иттипақиниң бийохимийәлик қораллар мутәхәссиси кен алибәкниң 1990-йилларда елан қилған «био апәт» намлиқ китабида тәкитлишичә, 1980-йилларниң башлирида хитай азадлиқ армийәсиниң корладики бир бийологийә тәҗрибиханисидин мениңгит вируси чиқип кетип, нурғун адәмниң юқумлинишини кәлтүрүп чиқарған икән.

Бил гертсниң билдүрүшичә, трамп һөкүмитиниң йеқинқи 2 йилдин бери елан қилған қорал-ярақларни чәкләш тоғрисидики йиллиқ доклатлирида хитайниң йошурун бийологийәлик қораллар тәрәққият программисидин әндишә қиливатқанлиқи тәкитләнгән икән.

Пикирләр (0)
Share
Толуқ бәт