Xitay hökümitining “Térrorluq” atalghusini Uyghurlar we tibetlerge ishlitiwatqanliqi mulahize qilinmaqta

Uyghurlarning weziyitini yéqindin közitip kéliwatqan awstraliyelik tetqiqatchi jeymis léybold düshenbe küni “Dölet menpe'eti” zhurnilida élan qilghan maqaliside, xitay hökümitining térrorluqqa baha bérishte millet ayrimichiliqi qiliwatqanliqini bildürdi.

U xitay hökümitining adette Uyghurlar we tibetler peyda qilghan heriketlerni derhal térrorluq bilen eyibleydighanliqi, emma xitaylar we shundaqla Uyghur, tibet bolmighan bashqa milletler peyda qilghan oxshash xaraktérdiki heriketlerni hazirghiche térrorluq dep atap baqmighanliqini bayan qilghan.

Uning éytishiche, amérika qatarliq gherb döletliride adette awam ichide qorqunch peyda qilish arqiliq özining siyasiy, iqtisadiy we diniy meqsetlirini ishqa ashurushni meqset qilghan zorawanliq heriketlirini térrorluq dep atisa, xitay hökümiti uni yenimu kéngeytip “Oy-pikir, bayan we yürüsh-turush” nimu térrorluq katégoriyesi ichige kirgüzgen we bu arqiliq tinch siyasiy pa'aliyet bilen shughullan'ghan Uyghur ziyaliysi ilham toxtini we tibet rahibi tenzin rinpochini térrorluq we bölgünchilik bilen eyiblep jazalighan.

Jeymis léybold shundaqla bu yil séntebirde gu'angshi ölkiside partlatquch qachilan'ghan pochta yollanmisi ewetish weqeside on kishi ölgen we iyulda shendungdiki adem bomba hujumida ikki adem ölüp, 24 adem yarilan'ghan bolsimu, emma da'irilerning bu heriketlerge peqetla adettiki jinayi délo qatarida mu'amile qilghanliqini bayan qilip, xitaydiki heqiqiy tehditning shi jinping ilgiri sürüwatqan xelq'aragha baghlan'ghan térror herikiti emeslikini eskertken.