Уйғур вә тибәтләр 1‏-өктәбир күни бирюсселда “хитайниң 70 йиллиқ бастурушқа қарши әркинлик намайиши” қилидикән

Мухбиримиз әркин
2019-09-27
Share

Хитай һөкүмити 1‏-өктәбир күни хитай хәлқ җумһурийити қурулғанлиқиниң 70 йиллиқини дағдуғилиқ тәбрикләшкә тәйярлиқ қиливатқан бир мәзгилдә явропадики уйғур вә тибәтләр белгийә пайтәхти бирюсселда “хитайниң 70 йиллиқ бастурушқа қарши кишилик һоқуқ вә әркинлик намайиши” елип беришқа тәйярлиқ қилмақта икән.

Вакаләтсиз милләтләр тәшкилати, дуня уйғур қурултийи, хәлқара тибәт һәрикити қатарлиқ тәшкилатлар 26‏-сентәбир күни ортақ баянат елан қилип, намайишниң хитайни кишилик һоқуққа хилаплиқ қилишқа хатимә беришкә чақиридиғанлиқини билдүргән. Баянатта намайишқа хоңкоң вәкиллириниң қатнишидиғанлиқи шундақла компартийәниң 70 йиллиқ бастурушиниң қурбанлириға һөрмәт билдүрүлидиғанлиқи вә хитайниң пуқраларниң негизлик кишилик һоқуқи һәм әркинликигә һөрмәт қилишқа чақирилидиғанлиқи тәкитләнгән.

Баянатта йәнә д у қ ниң рәиси долқун әйсаниң сөзи нәқил кәлтүрүлүп, “1 милйондин 3 милйонғичә уйғур йиғивелиш лагерлириға қамилип, уйғурларниң пәрқлиқ бир хәлқ сүпитидики мәвҗутлуқи еғир тәһдиткә учраватқанлиқи илгири сүрүлгән. Шундақла “уйғурларниң мәдәнийити, тили диний вә етник кимлики хитай һөкүмити тәрипидин йоқитилишқа дуч кәлмәктә,” дейилгән. 

Хәлқара тибәт һәрикити тәшкилатниң явропа иттипақи ишлириға мәсул директори винчент мәттен “хитай тибәтләрниң мәдәнийити, диний, тибәт кимликигә шәпқәтсизлик билән бузғунчилиқ қилип кәлгән болсиму, лекин у тибәттики мәсилини етирап қилип вә далай ламаниң тибәт хәлқиниң түп һәқ-һоқуқи вә әркинликигә һөрмәт қилиш асасидики сөһбәт чақириқиға җаваб қайтуруши керәк,” дегән.

Баянатта илгири сүрүлүшичә, хитайниң кишилик һоқуқ вә әркинликни бастурушиға қарши явропа иттипақи вә хәлқара җәмийәтниң күчлүк һәм принсипал инкас қайтуруп, хитайниң қилмишини җавабкарлиққа тартиши керәк икән. Баянатта “кишилик һоқуқ мәсилиси явропа иттипақи рәһбәрлириниң хитай билән болған мунасивәтлиридики әң муһим хизмитигә айлиниши вә әң юқири сәвийәдә системилиқ оттуриға қоюлуши керәк,” дейилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт