Uyghur we tibetler 1‏-öktebir küni biryussélda "Xitayning 70 yilliq basturushqa qarshi erkinlik namayishi" qilidiken

Muxbirimiz erkin
2019-09-27
Élxet
Pikir
Share
Print

Xitay hökümiti 1‏-öktebir küni xitay xelq jumhuriyiti qurulghanliqining 70 yilliqini daghdughiliq tebrikleshke teyyarliq qiliwatqan bir mezgilde yawropadiki Uyghur we tibetler bélgiye paytexti biryussélda "Xitayning 70 yilliq basturushqa qarshi kishilik hoquq we erkinlik namayishi" élip bérishqa teyyarliq qilmaqta iken.

Wakaletsiz milletler teshkilati, dunya Uyghur qurultiyi, xelq'ara tibet herikiti qatarliq teshkilatlar 26‏-séntebir küni ortaq bayanat élan qilip, namayishning xitayni kishilik hoquqqa xilapliq qilishqa xatime bérishke chaqiridighanliqini bildürgen. Bayanatta namayishqa xongkong wekillirining qatnishidighanliqi shundaqla kompartiyening 70 yilliq basturushining qurbanlirigha hörmet bildürülidighanliqi we xitayning puqralarning négizlik kishilik hoquqi hem erkinlikige hörmet qilishqa chaqirilidighanliqi tekitlen'gen.

Bayanatta yene d u q ning re'isi dolqun eysaning sözi neqil keltürülüp, "1 Milyondin 3 milyon'ghiche Uyghur yighiwélish lagérlirigha qamilip, Uyghurlarning perqliq bir xelq süpitidiki mewjutluqi éghir tehditke uchrawatqanliqi ilgiri sürülgen. Shundaqla "Uyghurlarning medeniyiti, tili diniy we étnik kimliki xitay hökümiti teripidin yoqitilishqa duch kelmekte," déyilgen. 

Xelq'ara tibet herikiti teshkilatning yawropa ittipaqi ishlirigha mes'ul diréktori winchént mettén "Xitay tibetlerning medeniyiti, diniy, tibet kimlikige shepqetsizlik bilen buzghunchiliq qilip kelgen bolsimu, lékin u tibettiki mesilini étirap qilip we dalay lamaning tibet xelqining tüp heq-hoquqi we erkinlikige hörmet qilish asasidiki söhbet chaqiriqigha jawab qayturushi kérek," dégen.

Bayanatta ilgiri sürülüshiche, xitayning kishilik hoquq we erkinlikni basturushigha qarshi yawropa ittipaqi we xelq'ara jem'iyetning küchlük hem prinsipal inkas qayturup, xitayning qilmishini jawabkarliqqa tartishi kérek iken. Bayanatta "Kishilik hoquq mesilisi yawropa ittipaqi rehberlirining xitay bilen bolghan munasiwetliridiki eng muhim xizmitige aylinishi we eng yuqiri sewiyede sistémiliq otturigha qoyulushi kérek," déyilgen.

Toluq bet