Uyghur rayonida taratqularni bashqurushta yughurulma tereqqiyat pilani yolgha qoyulmaqchi

Uyghur rayonluq hökümetning organ tili bolghan tengritagh torida bügün xewer qilinishiche, da'iriler taratqularni bashqurushta yughurulma tereqqiyat namidiki yéngi bir pilanni yolgha qoymaqchi.

Xewerdin melum bolushiche, Uyghur aptonom rayonluq siyasiy kéngesh 18-öktebir küni chüshtin burun “En'eniwi taratqular bilen yéngi taratqularning yughurulma tereqqiyatini ilgiri sürüsh” dégen témida yighin ötküzgen.

Yighinda ebediy eminlik we muqimliqqa képillik qélish üchün, axbarat we jama'et pikri saheside teshebbuskar orunda turushning zörürlüki tekitlen'gen we yughurulma tereqqiyat pilanini izchillashturush teshebbus qilin'ghan. Emma, xewerde yughurulma tereqqiyat pilanining konkrét chare-tedbirliri tilgha élinmighan.

Bezi közetküchiler, Uyghur rayonda yéqinda yüz bergen bozqir we misranim torlirining taqilishi, tor bashqurghuchi we yazghuchilirining tutulushi, shundaqla baghdash qatarliq alqishliq torlarda bezen hökümet chaqiriqlirining orun élishini, ene shu yughulma tereqqiyat pilanining ijra'atining bir parchisi bolushi mumkin dep qarashmaqta.

Bu xil qarashtiki közetküchilerdin yolwas ependining bayan qilishiche, yughurulma tereqqiyat, xitay dölet axbarat organlirining Uyghur ijtima'iy we shexsiy torbetlirini yutuwélish we özi üchün xizmet qildurush jeryanidur.