“Qeshqer konasheher höjjetliri” de tutqundiki minglighan Uyghurning tizimliki ashkarilan'ghan

Muxbirimiz erkin
2022-05-13
Share

Chet el taratquliri élan qilghan “Qeshqer konasheher höjjetliri” de xitay hökümiti teripidin tutqun qilinip késiwétilgen 10 mingdin artuq Uyghurning tizimliki ashkarilan'ghan. Fransiye agéntliqi teripidin élan qilin'ghan bu höjjet buningdin xéli burun ashkarilan'ghan bolsimu, lékin höjjettiki tutqunlarning salahiyitini delilleshke nechche ay waqit ketken. Melum bolushiche, “Qeshqer kona sheher höjjetliri” xitayning “Qaraqarash höjjetliri” din kéyin ashkarlan'ghan yene bir muhim mexpiy höjjiti hésablinidiken.

Bu höjjet qeshqerning kona sheher nahiyesidin tutqun qilin'ghan Uyghurlarning tizimliki bolup, uningda tutqun qilin'ghan 10 mingdin artuq Uyghurning tutqun qilinish sewebi, qamaqliq orni qatarliqlargha da'ir uchurlar bayan qilin'ghan. Chet el taratqulirining xewer qilishiche, chet eldiki nurghun Uyghurlar özlirining 2017-yildin béri ghayip bolghan a'ile ezaliri, uruq-tughqanliri, dost-yarenliri we yurtdashlirining aqiwitini bu höjjettin bilgen. Radiyomizning muxbiri nur'iman abduréshitning ata-anisi bilen ikki erkek qérindishining 2017-yildin kéyin tutqun qilinip, késiwétilgenliki melum bolghan bolsimu, biraq ularning aqiwitidin hazirgha qeder xewer bolmighan idi.

Fransiye agéntliqining bildürüshiche, nur'imanning türkiyediki singlisi nursiman abduréshit bu höjjettin memet'ili isimlik bir inisining 15 yil 11 ayliq késilip, aqsu shehirining sirtidiki bir türmige qamalghanliqini bilgen.

Uning fransiye agéntliqigha bildürüshiche, u “Qeshqer konasheher höjjetliri” din özlirining kentidinla tutqun qilinip késiwétilgen 100 din artuq kishini tonughan. U yene höjjetiki isimlerdin özliri turushluq yézidiki bashqa yette kentte olturushluq kishilerni tonughanliqi, ularning hemmisining “Térorluq” bilen héchqandaq alaqisi yoq kichik tijaretchiler we ishlemchiler ikenlikini éytqan. Közetküchilerning éytishiche, bu höjjet xitayning Uyghurlargha irqiy qirghinchiliq qilghanliqini yenimu ilgirligen halda ispatlaydighan muhim bir delil iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet