Uyghurlar diyarida yette milyon déhqan-charwichi “Emgek téxnika terbiyelesh kursi” gha qatnishidu

Muxbirimiz eziz
2019.01.08

Xelq'araning bésimi astida xitay hökümiti lagérlarni herqaysi jaylardiki kishilerge höner-téxnika ögitidighan “Kespiy terbiyelesh mektipi” dep aqlighan idi. Herqaysi sahelerdin kelgen ékskursiyechilerning bu “Mektep” lerde körgenliri “Kursantlar” ning ashpezlik, tiküchilik, satirashliq qatarliq hönerlerni öginiwatqanliqi bolghan idi.

“Shinjang xewer tori” ning 8-yanwardiki xewiride éytilishiche, qish peslide herqaysi jaylardiki yette milyon déhqan-charwichining “Igilik tiklesh iqtidarini ashurush” üchün xitay da'iriliri yéza-kentlerning özidila “Téxnika terbiyelesh” nuqtiliri tesis qilishni qarar qilghan. Xewerde buninggha misal teriqiside chöchek shehirining boztagh déhqanchiliq meydanidiki bir qisim kent déhqanlirining bolka pishurushni ögen'genliki bayan qilin'ghan. Bu xildiki “Déhqanlar öydin chiqsila baralaydighan ‛téxnika terbiyelesh‚ nuqtiliri könes, uchturpan qatarliq nahiyelerdimu jiddiy omumlishiwatqan bolup, bu jaylarda déhqan-charwichilarning höner-téxnika öginishtin bashqa yene dölet til-yéziqi, qanun we siyasetlernimu öginidighanliqi alahide tekitlen'gen.

Melum bolushiche, bu xil “Téxnika terbiyelesh” nuqtiliri herqaysi jaylardiki yéza-qishlaqlarning hemmisidila tesis qilinidighan bolup, bu yil etiyazliq térilghu mezgilige qeder yette milyon déhqan-charwichini mushundaq “Téxnika terbiyelesh” ke qatnashturush emelge ashurulidiken.

Analizchilar bu heqte pikir qilip: “Nöwette ikki-üch milyon kishining lagérlargha qamalghanliqi algha sürülüwatqanda yene yette milyon kishini ‛téxnika terbiyelesh‚ke ewetish mesilisining otturigha qoyulushi hazirqi siyasiy basturushning yéngi shepisining béshariti bolushi mumkin” déyishmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.