Diplomat zhurnilida Uyghur élidiki ziyaret xatirisi élan qilindi

5-Féwral küni “Diplomat” zhurnilida “Shinjangdiki bir bayram” mawzusida bir parche ziyaret xatirisi élan qilindi. Mezkur ziyaret xatirisi tetqiqatchi rut in'gramning Uyghur élige yéqinda qilghan ziyariti asasida yézilghan. U maqaliside, Uyghur élidiki orwélche nazaret sistémisi, chékidin ashqan bixeterlik tedbirliri we ochuq-ashkara halda Uyghurlargha qaritiliwatqan kemsitish siyasetliri üstide tepsiliy toxtalghan.

U ziyariti dawamida, Uyghurlarning dawamliq yollarda, dukanlarning kirish éghizida birmu-bir tekshürülidighanliqini, emma xitaylarning tebessum bilen bu tosuqlardin ötküzüwétilidighanliqini körgen.

Uning éytishiche, sheherler ara qatnaydighan uzun yolluq aptobuslardimu Uyghur yoluchilar birdek aptobustin chüshürülüp tekshürülidiken, emma xitay yoluchilar bexiraman sepirini dawam qilidiken.

U ziyaret xatiriside, Uyghur élining saqchi, qoralliq saqchi we herbiyler, herbiy aptomobillar bilen toshup ketkenlikini bayan qilip, hemmila kishining emeliyette mewjut bolmighan bir düshmen bilen küresh qilishtin ibaret jiddiy bir weziyet ichide yashaydighanliqini, hökümetning meqsitining xelqni ashundaq bir düshmenning mewjutluqigha ishendürüsh ikenlikini bayan qilghan. U Uyghur élining hazir xitay sayahetchiler bilen toshup kétishidiki sewebnimu hökümetning hazir Uyghur élini “Bixeter boldi” dep teshwiq qilishi bilen munasiwetlikini bildürgen.

Aptor ziyariti dawamida yene, nurghun öylerning ishiklirining péchetlen'genlikini, kochilarda balilar we yashan'ghanlar sanining yash we ottura yashliqlargha qarighanda normalsiz derijide köplükini bayqighan.

Aptor xitay hökümitining Uyghur élide bir milyondin oshuq Uyghurni yaghliq chigish, bayraq chiqirish murasimigha kech qélish, normalsiz burut qoyush dégendek atalmish “Jinayet” ler bilen lagérgha qamighanliqini bildürgen.