Хитай һөкүмити уйғур елидики “әң чоң паш қилғучи” ни 150 миң йүән билән мукапатлиған

“шинҗаң хәвәрлири тори” ниң йеқинда чиқарған бир хәвиригә қариғанда, уйғур аптоном районлуқ җиддий әһвалға тақабил туруш назарити “қанун бойичә бир тәрәп қилиш” қа тегишлик җиддий әһвалдин мәлумат бәргүчиләрни мукапатлиған. Хәвәрдә, бу хил җиддий әһваллар 10 түргә айрилған болуп, униң ичидә кан бихәтәрлики, кархана бихәтәрлики, ишләпчиқириш бихәтәрлики билән мунасивәтлик җиддий әһваллардин башқа йәнә, “сиясий бихәтәрлик, мәмурий бихәтәрлик” кә мунасивәтлик әһвалларму бар икән.

Хәвәрдин мәлум болушичә, җиддий әһвалға тақабил туруш назарити уйғур елиниң һәр қайси җайлиридики идарә-орган, кан, кархана вә башқа орунларға телефонда паш қилиш мәхсус линийәси орнатқан. Шундақла, мәзкур назарәтниң тор бети вә үндидар суписида мәлум қилишни йолға қойған; бу арқилиқ “хәлқ аммиси һәр қандақ вақитта җиддий әһвалдин мәлумат берәләйдиған система” бәрпа қилған.

Бу хәвәрдә, “җиддий әһвални паш қилғучилар” ниң төвини 20 миң йүәндин юқириси 150 миң йүәнгичә мукапатланғанлиқи елан қилинған һәм бу арқилиқ техиму көп паш қилғучиларниң мәйданға келишигә риғбәт берилгән.

Хитайниң көп йиллардин буян уйғур елидә сақчихана вә идарә-органларни ишқа селип тәқип-назарәт системиси қурғанлиқи, шундақла “аммиви назарәт” ни күчәйтип, кишиләрни бир-бирини көзитишкә салғанлиқи мәлум болуп келиватқаниди; 2019-йил 2-айда, байинғолин областлиқ парткомниң бирликсәп бөлүми уқтуруш чиқирип, кишиләрни, бөлгүнчилик идийәсидики диний затлар, “икки йүзлимичиләр” вә уларниң арқа тирәклирини паш қилишқа чақирған һәм буниң үчүн мәхсус телефон линийәси тәсис қилғаниди. юқириқи хәвәрдә болса хитайдики әнсизликниң давамлишиватқанлиқи вә “паш қилиш” ниң кан-карханиларғичә кеңәйгәнлики билинмәктә.