Xitay hökümiti Uyghur élidiki “Eng chong pash qilghuchi” ni 150 ming yüen bilen mukapatlighan

“Shinjang xewerliri tori” ning yéqinda chiqarghan bir xewirige qarighanda, Uyghur aptonom rayonluq jiddiy ehwalgha taqabil turush nazariti “Qanun boyiche bir terep qilish” qa tégishlik jiddiy ehwaldin melumat bergüchilerni mukapatlighan. Xewerde, bu xil jiddiy ehwallar 10 türge ayrilghan bolup, uning ichide kan bixeterliki, karxana bixeterliki, ishlepchiqirish bixeterliki bilen munasiwetlik jiddiy ehwallardin bashqa yene, “Siyasiy bixeterlik, memuriy bixeterlik” ke munasiwetlik ehwallarmu bar iken.

Xewerdin melum bolushiche, jiddiy ehwalgha taqabil turush nazariti Uyghur élining her qaysi jayliridiki idare-organ, kan, karxana we bashqa orunlargha téléfonda pash qilish mexsus liniyesi ornatqan. Shundaqla, mezkur nazaretning tor béti we ündidar supisida melum qilishni yolgha qoyghan؛ bu arqiliq “Xelq ammisi her qandaq waqitta jiddiy ehwaldin melumat béreleydighan sistéma” berpa qilghan.

Bu xewerde, “Jiddiy ehwalni pash qilghuchilar” ning töwini 20 ming yüendin yuqirisi 150 ming yüen'giche mukapatlan'ghanliqi élan qilin'ghan hem bu arqiliq téximu köp pash qilghuchilarning meydan'gha kélishige righbet bérilgen.

Xitayning köp yillardin buyan Uyghur élide saqchixana we idare-organlarni ishqa sélip teqip-nazaret sistémisi qurghanliqi, shundaqla “Ammiwi nazaret” ni kücheytip, kishilerni bir-birini közitishke salghanliqi melum bolup kéliwatqanidi؛ 2019-yil 2-ayda, bayin'gholin oblastliq partkomning birliksep bölümi uqturush chiqirip, kishilerni, bölgünchilik idiyesidiki diniy zatlar, “Ikki yüzlimichiler” we ularning arqa tireklirini pash qilishqa chaqirghan hem buning üchün mexsus téléfon liniyesi tesis qilghanidi. Yuqiriqi xewerde bolsa xitaydiki ensizlikning dawamlishiwatqanliqi we “Pash qilish” ning kan-karxanilarghiche kéngeygenliki bilinmekte.