Uyghurlar diyarida yéngi bir nöwetlik siyasiy heriketning béshariti körülmekte

Xitay hökümitining Uyghurlar diyaridiki basturush siyasiti xelq'araning küchlük tenqidige duch kéliwatqanda yene bir qétimliq yéngi siyasiy dolqunning yétip kélish aldida turuwatqanliqi melum bolmaqta.

Xitay bashqurushidiki “Tengritagh” torining 11-iyuldiki xewiride éytilishiche, 6-iyundin 15-iyun'ghiche ölke derijilik 65 neper rehbiriy kadir yépiq shekillik öginishke teshkillen'gen. Partkom sékrétari chén chüen'go bu jeryanda ikki nöwet mexsus körsetme xaraktérlik léksiye bergen. Ular bu jeryanda shi jinpingning bir qisim eserlirini hemde “Shinjang xizmiti heqqidiki muhim yolyoruqliri” ni ögen'gen. Shuning bilen birge “Mesilini chongqurlap tekshürüsh, menbesini qézish, öginishni eng ichki yürek-baghrighiche yetküzüsh” ke teshkillen'gen.

Iyunning béshidin tartip herqaysi jaylardiki hökümetler shi jinpingning “Ejdadlarning arzusini untumasliq, burchni mehkem este saqlash” témisidiki terbiye xizmet yighinini omumlashturuwatqan bolup, “Shi jinping yadroluqidiki partiye merkiziy komitétining shinjangni idare qilish istratégiyesini, ijtima'iy muqimliq we ebediy eminlik berpa qilishtek bash nishanni qéti ijra qilish” chaqiriqi otturigha qoyuluwatqanliqi melum.

Analizchilar bu heqte pikir qilip: “Bu hal xitay da'irilirining atalmish ‛ijtima'iy muqimliq‚ namida yene bir qétimliq zor kölemlik basturush herikitini ijra qiliwatqanliqining béshariti” dep körsetti.