Уйғур районидики тәқип-назарәт системисида сақчилар пуқраларниң өйлиридики ичкий әһваллардин толуқ хәвәрдар болуп турған

Вашингтондин мухбиримиз җәвлан тәйярлиди
2023.10.11

“хитай хәвәрлири” тори 11-өктәбир күни чиқарған бир хәвәрдә, йәркән наһийә игәрчи сақчиханисиниң хадими алим низамидинниң “иш-излири” тонуштурулған болуп, у 2015-йил сақчи болғандин буян “биринчи сәптә чиң туруп”, башқуруш тәвәсидики хәлқниң “һалидин хәвәр алған”. Униң бу тиң-тиңлаш хизмити шу дәриҗигә йәткәнки, 655 өйлүк аһалиси бар бир кәнт хәлқниң ичкий әһвалидин толуқ хәвәрдар болуп турған.

Алим низамидин кәнт аһалилиригә йеқинлишип, уларниң ичкий сирини билиштә уларға һәр вақит ярдәм қилиш тактикисини қолланған; “хәлқ қәлбини майил қилиш” ни өз хизмитини бималал қанат яйдурушниң асаси дәп билгән.

Бу хәвәрдә, алим низамидинниң “җәмийәт муқимлиқи” ни сақлаштики төһписи алаһидә гәвдиләндүрүлгән. Йәнә бир тәрәптин, хитай даирилириниң мушундақ йәрлик вә һөкүмәткә садиқ “асасий қатлам сақчилири” ға нәқәдәр еһтияҗлиқ икәнлики, алим низамидинниң бу җәһәттә үлгә болалайдиғанлиқи көрситилгән.

Хитай һөкүмити уйғур районидики хәлқни контрол қилишта мисли көрүлмигән тәқип-назарәт системисини орунлаштурған болуп, бу хәвәрдин хитайниң йәрлик сақчилардин тартип камера-үскүниләргичә һәммини ишқа салидиғанлиқи, һәр бир аилә, һәр бир булуң-пушқақ, һәтта кишиләрниң аилә сирлириму хитайниң назаритидин чәттә қалмайдиғанлиқи көрүлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.