Uyghur rayonidiki teqip-nazaret sistémisida saqchilar puqralarning öyliridiki ichkiy ehwallardin toluq xewerdar bolup turghan

“Xitay xewerliri” tori 11-öktebir küni chiqarghan bir xewerde, yerken nahiye igerchi saqchixanisining xadimi alim nizamidinning “Ish-izliri” tonushturulghan bolup, u 2015-yil saqchi bolghandin buyan “Birinchi septe ching turup”, bashqurush tewesidiki xelqning “Halidin xewer alghan”. Uning bu ting-tinglash xizmiti shu derijige yetkenki, 655 öylük ahalisi bar bir kent xelqning ichkiy ehwalidin toluq xewerdar bolup turghan.

Alim nizamidin kent ahalilirige yéqinliship, ularning ichkiy sirini bilishte ulargha her waqit yardem qilish taktikisini qollan'ghan؛ “Xelq qelbini mayil qilish” ni öz xizmitini bimalal qanat yaydurushning asasi dep bilgen.

Bu xewerde, alim nizamidinning “Jem'iyet muqimliqi” ni saqlashtiki töhpisi alahide gewdilendürülgen. Yene bir tereptin, xitay da'irilirining mushundaq yerlik we hökümetke sadiq “Asasiy qatlam saqchiliri” gha neqeder éhtiyajliq ikenliki, alim nizamidinning bu jehette ülge bolalaydighanliqi körsitilgen.

Xitay hökümiti Uyghur rayonidiki xelqni kontrol qilishta misli körülmigen teqip-nazaret sistémisini orunlashturghan bolup, bu xewerdin xitayning yerlik saqchilardin tartip kaméra-üskünilergiche hemmini ishqa salidighanliqi, her bir a'ile, her bir bulung-pushqaq, hetta kishilerning a'ile sirlirimu xitayning nazaritidin chette qalmaydighanliqi körülmekte.