Қазақистанлиқ бир уйғур аял 10 йилдин бери ғулҗидики уруқ-туғқанлириниң из-дерикини алалмиған

Мухбиримиз әркин
2019-10-14
Елхәт
Пикир
Share
Принт

Қазақистанлиқ уйғур гулбанум розийева йеқинда қазақистандики кишилик һоқуқ тәшкилати- «атаюрт пидаийлири» билән алақилишип, өзиниң 10 йилдин бери ғулҗидики уруқ-туғқанлириниң из-дерикини алалмайватқанлиқи, мәзкур тәшкилатларниң өзигә ярдәм қилип, уларниң из-дерикини қилип беришини илтимас қилған.

«Атаюрт пидаилири» ниң рәһбири бегзат мәқсутханниң йеқинда радийомизға билдүрүшичә, гулбанум розийева 8‏-өктәбир күни «атаюрт пидаилири» тәшкилати билән алақиләшкән. У өзиниң ғулҗида икки чоң дадиси, бир тағиси, дада җәмәт нәврә туғқанлирини өз ичигә алған 22 нәпәр уруқ-туғқининиң ғулҗидики бир йезида яшайдиғанлиқи, 10 йилдин бери уларниң из-дерикини алалмайватқанлиқини билдүргән.

Бу йил 57 яшлиқ гулбанум розийеваниң билдүрүшичә, униң туғқанлири олтурушлуқ кәнттики 1500 дәк нопусниң һәммиси уйғур болуп, у бу кәнттики башқа уйғурларни издигән болсиму, әмма бу кәнтлик һечқандақ бир уйғурни учриталмиған. «Ата-юрт пидаийлири» ниң рәһбири бегзат мәқсутхан радийомиз хитай бөлүминиң мухбириға бәргән учурида бу әһвал гулбанум розийевани бу кәнттики пүтүн уйғурлар лагерға елип кетилгән болуши мумкин, дегән гуманға кәлтүрүп қойғанлиқини билдүргән.

Дуня уйғур қурултийиниң баянатчиси дилшат ришит 14‏-өктәбир күни мәзкур вәқәгә қайтурған инкасида 2009‏-йили йүз бәргән «5‏-июл вәқәси» дин кейин ғулҗидики уйғурлар олтурушлуқ нурғун кәнтләрниң адәмсиз қалғанлиқини билдүргән. Униң илгири сүрүшичә, бәзи кишиләр лагерға елип кетилгән, бәзилири кесиветилгән. У «зорлуқ билән ғайиб қиливетиш бу районда омумйүзлүк һадисә. Һәрқандақ киши һәрқандақ вақитта тутқун қилиниши, коллектип йоқитиветилиши мумкин. . . Шуңа бу райондики бәзи кәнтләрдә адәм азийип кетиш, һәтта йеза-кәнтләрдә адәм қалмаслиқ әһвали йүз бәрмәктә,» дегән.

Пикирләр (0)
Share
Толуқ бәт