Qazaqistanliq bir Uyghur ayal 10 yildin béri ghuljidiki uruq-tughqanlirining iz-dérikini alalmighan

Qazaqistanliq Uyghur gulbanum roziyéwa yéqinda qazaqistandiki kishilik hoquq teshkilati- “Atayurt pida'iyliri” bilen alaqiliship, özining 10 yildin béri ghuljidiki uruq-tughqanlirining iz-dérikini alalmaywatqanliqi, mezkur teshkilatlarning özige yardem qilip, ularning iz-dérikini qilip bérishini iltimas qilghan.

“Atayurt pida'iliri” ning rehbiri bégzat meqsutxanning yéqinda radiyomizgha bildürüshiche, gulbanum roziyéwa 8‏-öktebir küni “Atayurt pida'iliri” teshkilati bilen alaqileshken. U özining ghuljida ikki chong dadisi, bir taghisi, dada jemet newre tughqanlirini öz ichige alghan 22 neper uruq-tughqinining ghuljidiki bir yézida yashaydighanliqi, 10 yildin béri ularning iz-dérikini alalmaywatqanliqini bildürgen.

Bu yil 57 yashliq gulbanum roziyéwaning bildürüshiche, uning tughqanliri olturushluq kenttiki 1500 dek nopusning hemmisi Uyghur bolup, u bu kenttiki bashqa Uyghurlarni izdigen bolsimu, emma bu kentlik héchqandaq bir Uyghurni uchritalmighan. “Ata-yurt pida'iyliri” ning rehbiri bégzat meqsutxan radiyomiz xitay bölümining muxbirigha bergen uchurida bu ehwal gulbanum roziyéwani bu kenttiki pütün Uyghurlar lagérgha élip kétilgen bolushi mumkin, dégen guman'gha keltürüp qoyghanliqini bildürgen.

Dunya Uyghur qurultiyining bayanatchisi dilshat rishit 14‏-öktebir küni mezkur weqege qayturghan inkasida 2009‏-yili yüz bergen “5‏-Iyul weqesi” din kéyin ghuljidiki Uyghurlar olturushluq nurghun kentlerning ademsiz qalghanliqini bildürgen. Uning ilgiri sürüshiche, bezi kishiler lagérgha élip kétilgen, beziliri késiwétilgen. U “Zorluq bilen ghayib qiliwétish bu rayonda omumyüzlük hadise. Herqandaq kishi herqandaq waqitta tutqun qilinishi, kolléktip yoqitiwétilishi mumkin. . . Shunga bu rayondiki bezi kentlerde adem aziyip kétish, hetta yéza-kentlerde adem qalmasliq ehwali yüz bermekte,” dégen.