Uyghur élida "Kadirlarning amma bilen tughqan bolush pa'aliyetliri" bashlandi

Muxbirimiz irade
2016-10-18
Élxet
Pikir
Share
Print

Uyghur aptonom rayon da'iriliri muqimliqni kücheytish üchün milletlerni ittipaq qilishning türlük chare-tedbirlirini qollanmaqta. Melum bolushiche, Uyghur élida "Her jay, her derijilik kadirlarning amma bilen tughqan bolush" pa'aliyetliri bashlan'ghan.

Tengritagh torida bérilgen xewerdin melum bolushiche, 16-öktebir küni Uyghur aptonom rayonluq partkomning sékrétari chén chüen'go we Uyghur aptonom rayonning re'isi shöhret zakirlarning riyasetchilikide "Milletler ittipaqliship bir a'ile kishiliridek bolush"pa'aliyiti seperwerlik yighini échilghan.

Yighinda élan qilin'ghan qarargha asasen, buningdin kéyin Uyghur élidiki aptonom rayon derijilik memuriy, kespiy orunlardiki 110 ming kadir, ishchi-xizmetchining hemmisi jenubiy shinjangdiki töt wilayet we oblasttiki amma bilen tughqandarchiliq munasiwiti ornitidiken.

Xewerde ilgiri sürülüshiche, tughqandarchiliq munasiwiti ornitishta "Birge-bir tughqandarchiliq munasiwiti ornitish" usuli qollinilidighan bolup, "Xenzu kadirlar bilen asasiy qatlamdiki az sanliq millet ammisi, az sanliq millet kadir ishchi-xizmetchiler bilen asasiy qatlamdiki xenzu ammisi yaki az sanliq millet ammisi" tughqandarchiliq munasiwiti ornitidiken.

Tughqandarchiliq ornitish üchün békitilgen ölchem boyiche, kadir, ishchi-xizmetchiler bilen asasiy qatlam ammisi eng az dégende her ikki ayda bir qétim körüshüp turushi, kadir, ishchi-xizmetchiler asasiy qatlamdiki ammining öyige bérishi yaki ularni öz öyige méhman bolup kétishke chaqirishi kérek iken.

Chet'ellerdiki Uyghur közetküchiler bolsa buni "Bir sün'iylik tüsi alghan pa'aliyet " dep bahalidi. Ular, Uyghur éli da'irilirining bundaq mejburiy we sün'iy usullar arqiliq milletler ittipaqliqi yaritishining mumkin emeslikini, bir jem'iyette peqet barawerlik we adil siyaset bolghandila tinchliq we inaqliq shekillinidighanliqini tekitleshti.

Toluq bet