Әрсиз уйғур аилилиригә хитай әр кадирлириниң киривелиши давамлиқ диққәттә болмақта

Мухбиримиз әзиз
2019-11-12
Елхәт
Пикир
Share
Принт

Хитай һөкүмити уйғурлар диярида мәҗбурий иҗра қиливатқан «қошмақ туғқан болуш» тәдбири бойичә бир қисим хитай кадирлириниң уйғур аилилиригә кирип йетиватқанлиқи һәққидә көпләп хәвәрләр мәлум болғаниди.

Йеқинда бу һадисиниң толиму қәбиһ болған йәнә бир йүзи көпләп ашкарилинишқа башлиди: иҗтимаий таратқуларда ашкарилинишичә буниңда әрлири лагерларға қамилип кәткән уйғур аяллириниң өйлиригә «қошмақ туғқан» намида киргән хитай әр кадирлириниң «төттә биллә болуш» намида уйғур аяллири билән бир супида ухлиши һазир җиддий кеңәймәктә икән.

Йеқинда иҗтимаий таратқуларда мушундақ бир әр хитай кадирниң нәччә күнләп йетивалған өйдин меңиш алдида шу өйдики аял вә униң балилири билән биллә тамақ йегәнлики, балилардин бириниң «(хитай кадир) дүшәнбә күни чүштә атам кәлсә маңиду. Шундақму апа?» дәп сориғанлиқи кәң тарқалди. Буниңға охшап кетидиған башқа син көрүнүшлири көп болуп, хитай һөкүмитиниң лагердикиләрни қийнаш билән биргә, лагер сиртидики уйғурларниң һаятиға қандақ қисмәтләрни селиватқанлиқи җанлиқ көрситилди.

Бу һәқтики син көрүнүшлиригә чүшкән баһаларда бәзиләр буни «хитай һөкүмитиниң тарихта мисли көрүлмигән усуллар арқилиқ уйғурларни мәҗбурий ассимилятсийә қилиш васитиси» десә, йәнә бәзиләр «бу сепи өзидин ирқий қирғинчилиқ» дегән.

Пикирләр (0)
Share
Толуқ бәт