Уйғур елида 70 пирсәнт деһқан аилиси "кәспләштүрүп башқуруш" астиға елинған

Мухбиримиз әркин
2021-11-29
Share

Хитай һөкүмити уйғур елида 70 пирсәнт деһқан аилисини өзлириниң әнәнивий деһқанчилиқ ишләпчиқиришидин йирақлаштуруп, хитай карханилирида ишләйдиған әмгәк күчлиригә айландуруп болған. Хитай таратқулириниң хәвәрлиридә ашкарлишичә, даириләр "кәспләштүрүп башқуруш" намидики бу һәрикәттә, аталмиш "йезилардики артуқ әмгәк күчлириниң йөткәп ишқа орунлишишға түрткә болған."

Хәвәрдә уйғур аптоном райони миқясидики түрлүк йеза игиликни "кәспләштүрүп башқуруш" тәшкилатлириниң 29 миң 600 гә йәткәнлики, 70 пирсәнт деһқан аилисиниң "кәспләштүрүп башқуруш" астиға елинғанлиқи тәкитләнгән.

Хитай һөкүмити 2017-йилидин башлап районда чоң тутқунға тор селиш билән бир бир вақитта, уйғур ишләпчиқириш күчлириниң қурулмисиниму өзгәртишкә киришип, уйғур деһқан аилилирини районниң ичи-сиртидики хитай карханилирида мәҗбурий ишләшкә йөткигән. "шинҗаң гезити" ниң қәйт қилишичә, "йеза-‍игиликини кәспләштүрүп башқуруш йезилардики артуқ әмгәк күчлириниң йөткилишигә түрткә болған." уйғур аптоном районлиқ һөкүмәтниң 28-ноябир чақирған ахбарат йиғинидиму, хитайниң бу сиясити мәдһийәлинип, мәҗбурий әмгәкниң барлиқини рәт қилған.

"йеза-кәнтләрни гүлләндүрүш кәспий маһарәт тәрбийәси" намлиқ бу ахбарат йиғини әнгилийәдики һаллам шифелд университетиниң бир тәтқиқат орни хитайниң "шинҗаң пахтиси" һәққидә тәкшүрүш доклати елан қилип арқидинла чақирилған. Һаллам шифелд университетиниң һелена кеннидий хәлқара адаләт мәркизи тәйярлиған бу доклатта, хитайниң "шинҗаң пахтиси" шәрқий-җәнубий асия арқилиқ давамлиқ дуня базириға кириватқанлиқи, районда ишләпчиқирилған мәһсулатларниң мәҗбурий қул әмгики билән зич мунасивәтлик икәнлики тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт