Хитай даирилири уйғур елида пуқраларни әқлий иқтидарлиқ ток саити биләнму назарәт қилишни йолға қойған

Хитай даирилири уйғур елида әқлий иқтидарлиқ ток саити арқилиқму пуқраларниң кундилик һәркитини назарәт қилишқа башлиған. Даириләр һазирға қәдәр уйғур елида 10 милйонға йеқин ток ишләткүчи абунтқа бу хил әқлий иқтидарлиқ ток саити орунлаштуруп болған. Көзәткүчиләрниң билдүрүшичә, мәзкур әқлий иқтидарлиқ ток саити абунтларниң ток сәрпиятиға даир санлиқ учурларни анализ қилип, ток сәрпиятидики “бинормаллиқ” ни алақидар орунларға инкас қилидикән.

Бу әсвап ток ишләткүчи абунтларни контрол қилиш, көп санлиқ мәлумат йәткүзүш шәкли билән қош йөнилишлик санлиқ мәлумат алақиси қатарлиқ көп хил әқлий иқтидарға игә икән. Шинхуа агентлиқиниң билдүрүшичә, һазирға қәдәр райондики 9 милйон 980 миң 160 абунтқа бу әсвап орунлаштурулуп болған. Хитай енергийә ториниң райондики бир әмәлдари електир тори ширкәтлириниң чоң санлиқ мәлумат анализ техникисини ишлитип, әқлий иқтидарлиқ ток саитиниң санлиқ мәлуматлирини бир тәрәп қилидиғанлиқини билдүргән.

Көзәткүчиләр, әқлий иқтидарлиқ ток саити хитайниң районда қурған “дигитал назарәт системиси” ниң бир парчиси икәнликини илгири сүрмәктә. Кишилик һоқуқ тәшкилатлириниң қәйт қилишичә, хитай даилири 2017-йили башланған чоң тутқунда кишиләрниң ишләткән ток, су, газ сәпияти, йемәк-ичмәк вә күндилик турмуш сәрпиятидики “бинормал” дәп қаралған истемал миқдариға қарап тутқун қилип, сорақ қилған яки лагер вә түрмиләргә қамиған икән.