Xitay da'iriliri Uyghur élida öymu-öy kirip “Asasiy qanun teshwiqati” herkiti qozghighan

Muxbirimiz erkin
2020.12.07
Share on WhatsApp
Share on WhatsApp

Xitay da'iriliri 12-aydin bashlap Uyghur ilida “Asasiy qanun teshwiqati heptiliki” namida yene yéngi siyasiy teshwiqat herikiti qozghighan. Xitay taratqulirining ashkarlishiche, nöwette da'iriler rayondiki idare-jem'iyet, mektep, yéza-kentlerde öymu-öy kirip “Asasiy qanun teshwiqati” élip barmaqtiken. Da'iriler yene qesem bérish murasimlirini ötküzüp, ammini xitay asasiy qanunigha bolghan sadaqitini bildürüshke teshkillimekte iken. “Aqsu géziti” ning bu heqtiki bir xewiride kadir we ammining bu heriket arqiliq “Asasi qanun éngi üzlüksiz östürülgenliki, pütün jem'iyette asasiy qanunni hörmetlesh, asasiy qanunni qoghdashtek qoyuq keypiyat shekillinishke türtke bolghanliqi” tekitlen'gen.

Xitay da'irilirining bu heriketni rayondiki taratqularda keng teshwiq qilishidiki seweb melum emes. Lékin közetküchilerning qeyt qilishiche, bu heriketning milyonlighan Uyghur asasi qanun, aptonomiye qanuni we alaqidar xitay qanunlirigha xilap halda tutqun qilinip, lagérlargha qamalghan, ten jazasigha uchrighan, mejburiy emgekke sélin'ghan, tughmas qilin'ghan, diniy étiqadini inkar qilishqa mejburlan'ghan we yurt-makanliridin mejburiy köchürülüshtek éghir qanunsizliqqa uchrawatqan mezgilde élip bérilishi diqqet qozghaydiken.

“Aqsu géziti” ning xewride xitay kadirlirining yéza-kentlerge chüshüp, “Qoshmaqlashqan tuqqanliri” gha we kent ahalilirigha léksiye sözligenliki, bu arqiliq “Qanunchiliq teshwiqatini kishiler qelbige chongqur singdürgenliki” tekitlen'gen. Teshwiqat herikitide xitayning asasiy qanun, dölet xewpsizlik qanuni, milletler ittipaqliqi nizami qatarliq her xil qanun tüzümliri keng teshwiq qilin'ghan bolsimu, emma aptonomiye qanuni peqet tilgha élinmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet