Xitay da'iriliri Uyghur rayonida yene bir türküm emeldarlarni jazalighan

Muxbirimiz erkin
2019-12-10
Élxet
Pikir
Share
Print

10‏-Dékabir küni Uyghur rayonida yene bir türküm emeldarlarning qanun-intizamgha xilapliq qilish, ammining menpe'etini ziyan'gha uchritish, dégendek eyibleshler bilen tekshürülüshke bashlighanliqi yaki jazalan'ghanliqi élan qilindi.

Uyghur aptonom rayonluq intizam tekshürüsh we réwiziye komitétining ashkarilishiche, aptonom rayonluq qatnash-transport nazaritining emeldari ilham ablet tekshürüsh astigha élin'ghan. Ilham ablet qatnash-transport nazaritining 2 derijilik közetküchi emeldari bolup, nöwette u tekshürülmekte iken.

Aptonom rayonluq intizam tekshürüsh we réwiziye komitétining élanida uning "Qanun'gha we intizamgha éghir xilapliq qilish" bilen eyiblinip tekshürülüwatqanliqi ilgiri sürülgen bolsimu, lékin uning qanun we intizamgha konkrét qandaq xilapliq qilghanliqi chüshendürülmigen. Élanda yene Uyghur aptonom rayonluq charwa malliri karantin idarisining mu'awin bashliqi shi chingxu'aning tekshürülüwatqanliqi, uningmu "Qanun we intizamgha xilapliq qilish" bilen eyiblen'genliki ilgiri sürülgen.

Uyghur aptonom rayonluq intizam tekshürüsh we réwiziye komitéti 10‏-dékabir küni élan qilghan bashqa bir uqturushida yene, "Ammining menpe'etini ziyan'gha uchritish" bilen eyiblinip jazalan'ghan 8 kadirni élan qilghan. Bu 8 shexsning 5 nepiri xitay, 3 nepiri Uyghur we qazaq bolup, ular xoten nahiyelik Uyghur tébabetchilik doxturxanisining mudiri mutellip abdughéni, chapchal nahiyesidiki Uyghur ayal kent kadiri altun'ay ramazan, altay shehiridiki ijtima'iy rayonining qazaq millitidin bolghan partiye yachéyka sékrétari qumile yehya qatarliqlarni öz ichige alidu. Uqturushta qeyt qilinishiche, ulardin bezilirige wezipisidin élip tashlash, partiyedin qoghlap chiqirish, qattiq agahlandurush jazasi bérilgen, beziler qanuni jawabkarliqqa tartilip edliye organlirining bir terep qilishigha ötküzüp bérilgen.

Toluq bet