Хитай уйғур елидә "шинҗаң мәдәнийәт өзләштүрүш тәтқиқат институти" қурди

Мухбиримиз әркин
2020-12-14
Share

10-Декабир "шинҗаң педагогика университети" дә "шинҗаң мәдәнийәт өзләштүрүш тәтқиқат институти" қурулған. Хитай таратқулириниң билдүрүшичә, мәзкур органниң вәзиписи "җоңхуа мәдәнийити" ниң уйғур елидә өзлишишигә чарә-тәдбир вә пикир тәклипләрни бериш икән. Бу органниң хитай һөкүмити хәлқарада уйғурларниң әнәниви мәдәнийити, бинакарлиқи, турмуш усули, өрп-адәтлирини вәйран қилип, хитай мәдәнийитини уйғурларға мәҗбурий теңиштәк "мәдәнийәт қирғинчилиқи" елип бериш билән әйиблиниватқан мәзгилдә қурулуши диққәт қозғиди.

"шинҗаң гезити" ниң 13-декабир хәвәр қилишичә, "шинҗаң мәдәнийәт өзләштүрүш институти" ниң муһим тәтқиқат йөнилиши "мәдәнийәтни өзләштүрүшниң нәзәрийәви тәтқиқати, җуңхуа мәдәнийитини етирап қилиш тәтқиқати, дөләт ортақ тил-йезиқини илгири сүрүш тәтқиқати вә шинҗаң мәдәнийәт-сәнитиниң тарқилиш тәтқиқати, мәслиһәт бериш вә тәрбийәләшкә алақидар хизмәтләр" билән шуғуллинидикән.

Хәвәрдә йәнә бу органниң тәтқиқат нәтиҗилирини әмәлийәткә айландуруш механизми қуруп, "әнәниви җуңхуа мәдәнийити, инқилаб мәдәнийити, сотсиялистик илғар мәдәнийәтниң шинҗаңда тарқилиши вә кеңийишини һәр хил шәкилләрдә алға сүридиғанлиқи, санлиқ мәлумат амбири қуруп, униң үнүмини көзитидиғанлиқи" тәкитләнгән. Лекин көзәткүчиләрниң қәйт қилишичә, бу тәтқиқат орни хитайниң уйғур мәдәнийитини илгириләп вәйран қилип, уйғурларға хитай мәдәнийитини мәҗбурий қобул қилдурушниң нәзәрийәви асаси вә чарә-тәдбирлирини тәтқиқ қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт