Уйғур-хитай икки милләттин тойлашқан аилиләр хитай һөкүмәт таратқулириниң тәшвиқат обйектиға айланмақтикән

Мухбиримиз қутлан
2016-12-19
Share

Игилинишичә, хитай һөкүмәт таратқулири уйғур-хитай икки милләттин тойлашқан аилиләрни бәс-бәстә тәшвиқ қилишқа башлиған.

Тәңритағ ториниң бүгүнки хәвиригә қариғанда, җәнубий шинҗаң һәрбий райониниң хотәндә турушлуқ мәлум полкидики бир хитай рота командири билән хотән вилайәтлик җ х идарисиниң сақчиси гүлистанниң той қилип “үлгилик аилә” қурғанлиқи алаһидә тәшвиқ қилинған.

Хәвәрдә дейилишичә, 2012-йили улар иккиси той қилғандин буян хитайниң армийә, сақчи системиси вә һөкүмәт тәрәптин көп қетим “илғар аилә” болуп баһалинип мукапатланған. Тойдин кейин исмини дәй на дегән хитайчә исимға өзгәрткән гүлистан җәнубий шинҗаң һәрбий райони тәрипидин “10 мунәввәр һәрбий йәңгә” ниң бири дәп нам берилгән. Йеқинда уларниң аилисигә йәнә хитай бойичә “биринчи нөвәтлик мәмликәтлик мәдәнийәтлик аилә” дегән нам берилгәнлики мәлум.

Көзәткүчиләр, хитай һөкүмити билән армийә-сақчи системисиниң йеқиндин буян уйғур елидики милләтләрниң өз-ара қошулуп кетишини яки милләт һалқиған тойлишишни күчәп тәшәббус қиливатқанлиқини, һәтта бу хил аилиләрни сиясий вә иқтисадий җәһәттин риғбәтләндүрүватқанлиқини илгири сүрмәктә.

Чәтәлләрдики уйғур сиясий анализчилар, чен чвәнго уйғур аптоном райониға партком секретари болуп кәлгәндин буян аталмиш “қошмақ туғқан сиясити” ни күчәп йолға қоюп, райондики уйғурлар билән хитайларниң мунасивитини юмшитишқа, һәтта уларни туғқанлаштуруп миллий вә диний пәрқләрни йоқ қилишқа урунуватқанлиқини агаһландурмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт