Xitay da'iriliri Uyghur élide bu yilning deslepki üch peslide 440 ming ademni "Ishqa orunlashturghan"

Muxbirimiz erkin
2021-11-09
Share

Xitay da'irilirining Uyghurlarni "Namratliqtin qutquzush" namida mejburiy emgekke sélishni dawamliq kéngeytiwatqanliqi melum boldi. Uyghur aptonom rayonluq statistika idarisining ashkarilishiche, da'iriler bu yilning deslepki üch peslide Uyghur élining sheher-bazarlirida 440 ming 500 kishini ‍ishqa orunlashturghan bolup, bir yilliq wezipining 95.8 Pirsentini orundap bolghan. Bu, rayondiki ishqa orunlishish müshkül bolghan 28 ming 200 kishini öz ichige alidiken. Lékin statistika idarisi, bu kishilerning konkrét qaysi kesiplerge, qaysi rayondiki karxana we ish orunlirigha orunlashturulghanliqini chüshendürmigen.

Xitay hökümitining 2017-yili bashlan'ghan chong tutquni bilen bir waqitta, minglighan Uyghurni "Namratliqtin qutquzush" namida Uyghur rayonining ichi-sirtidiki karxanilargha yötkep mejburiy emgekke salghan. Bezi Uyghurlarni ‍özi turushluq yéza-kentlerdiki xitay karxanilirigha mejburiy orunlashturghan, keng kölemlik nawaychiliq karixanilirini qurup, Uyghur nawaylirini bu orunlargha yighiwalghan. Ularni az miqdarda mu'ashqa baghlighan bolsimu, biraq erkinlikidin pütünley mehrum qilghan. Xitayning bu herikiti amérika qatarliq döletlerde qarshiliqqa uchrighan. Amérika bu karxanilarda ishlepchiqirilghan mehsulatlarni import qilishni chekligen idi.

Aptonom rayonluq statistika idarisining "Shinjang géziti" gha bildürüshiche, da'iriler bu yil kirgendin béri, "Nuqtiliq ahalilerning ishqa orunlishishi we igilik tiklishini ishqa ashurush üchün…. . . Ishqa orunlishish qanallirini köp tereplimilik we köp shekillerde kéngeytken. Uyghur aptonom rayonluq statistika idarisining éytishiche, bu yil 9-ayning axirliri sheher-bazarlardiki tizimgha élin'ghan ishsizliq nisbiti 2.49 Pirsent bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet