Xitay, Uyghur yashlirini ichkirige yötkep, ichkiridin xitaylarni Uyghur rayonigha yötkimekte

Xitay hökümiti yézilardiki Uyghur yashlirini “Yéza éshincha emgek küchi” namida ichkiri ölkilerge yötkep, oxshash bir waqitta ichkiri ölkilerdin xitaylarni Uyghur rayonigha yötkeshni dawamlashturmaqta. Xitay taratqulirining yéqinda xewer qilishiche, yerlik da'iriler buningdin bir hepte awwal ghulja nahiyisidin 50 tek Uyghur qizni jyangsuning nentong, dégen yéridiki karxanilarda ishleshke yötkigen. Da'iriler téxi ötken aydila xoten shehiridin 233 yashni yötkigen. Ularning bir qismi chaqiliq nahiyisige bir qismi fujyen ölkisige yötkelgen idi. Ghulja nahiyilik adem bayliqi we ijtima'iy parawanliq idarisi ularni 1‏-mart küni ghulja nahiyisining tunggan üchün yézisida murasim ötküzüp jyangsugha yolgha salghan.

Ghulja nahiyilik hökümet torining xewiride bildürülüshiche, bu mezkur nahiyedin bu yil yötkelgen tunji türkümdiki “Éshincha emgek küchliri” iken. Da'iriler bu yil ichide ichkirige birer mingdek “Yéza éshincha emgek küchi” yötkesh pilani barliqini bildürgen. 

Xitay taratqulirining ashkarilishiche, da'iriler Uyghur yashlirini ichkiri ölkilerge yötkesh bilen bir waqitta ichkiridin mezkur rayon'gha dawamliq xizmetchi qobul qilmaqta iken. Qizilsu oblasti yéqinda ichkiri ölkilerdin 85 neper siyasiy qanun xadimi qobul qilghan. Qizilsu oblastliq hökümet yéqinda élan qilghan uqturushida siyasiy qanun sistémisigha qobul qilin'ghan 40 qa yéqin xadimning isimlikini élan qilghan. Melum bolushiche, ulardin peqet 2 nepiri Uyghur yaki bashqa yerlik milletlerdin iken. 

Xitayning Uyghur yashlirini “Éshincha emgek küchi” namida ichkiri ölkilerge yötkep, ichkiridin keng kölemlik xizmetchi qobul qilishi Uyghur kishilik hoquq teshkilatlirining tenqidige uchrap keldi. Uyghur kishilik hoquq teshkilatlirining ilgiri sürüshiche, xitay hökümiti ichkiridin keng kölemlik xizmetchilerni qobul qilish arqiliq “Éshincha emgek küchi” namida ichkirige yötkelgen yaki lagérlargha qamalghan Uyghurlarning bosh qalghan ornini toldurmaqta iken.