Amérika dölet mejlisi xitay ishliri ijra'iye komitéti qurban mamut qatarliqlarni qoyup bérishni telep qildi
2024.01.22
Amérika dölet mejlisi xitay ishliri ijra'iye komitéti 21-yanwar küni X (tiwittér) da bayanat uchuri bérip, dangliq Uyghur ziyaliysi, zhurnalist qurban mamutning qoyup bérilishini telep qilghan.
Uchurda mundaq déyilgen: “Zhurnalist qurban mamut 2017-yil amérikagha kélip tughqan yoqlap qaytqandin kéyin tutqun qilinip, 15 yilliq késiwétilgen. Xitay xelq jumhuriyiti Uyghur ziyaliylirini bir yolila tutqun qilip, Uyghur millitining medeniyet kimlikini yoqitishqa urunushliridin hésab bérishi kérek”.
Mezkur komitét yene 22-yanwar X (tiwittér) bergen bayanatida, dadisining neziriside du'a qilghan we öyide qur'an saqlighanliqi üchün tutulghan renagül ghénining qoyup bérilishini telep qilghan hemde xitay hökümiti teripidin mushundaq naheq tutulup uzun yilliq késiwétilgen Uyghurlarning qoyup bérilishi üchün amérika tashqi ishlar ministirliqining tirishchanliq körsitishi kéreklikini tekitligen.
Uningdin bashqa, amérika dölet mejlisi ezasi tom lentos (Tom Lantos) bashchiliqida qurulghan “Lentos kishilik hoquq we adalet fondi” namliq xelq'ara kishilik hoquq teshkilati 19-yanwar küni X da bayanat bérip, 2018-yildin buyan xitay türmiside yétiwatqan doxtur gülshen abbasqa erkinlik telep qilghan we uning bu hepte “Wijdan mehbusliri” tizimlikige kirgenlikini, yeni uning mezkur fondning “Erkinlikni qoghdash programmisi” gha kirgenlikini élan qilghan.
Amérika dölet mejlisi xitay ishliri ijra'iye komitéti we amérika tashqi ishla ministirliqi 11-yanwar küni “Naheq tutqun qilin'ghan siyasiy mehbuslar herikiti” ning bir yilliqi munasiwiti bilen ayrim-ayrim bayanat élan qilip, xitay da'irilirini Uyghur siyasiy mehbusliridin gülshen abbas, rahile dawut, ekber eset qatarliq ziyaliylarni qoyup bérishke chaqirghanidi.
Melum bolushiche, amérika dölet mejlisi xitay ishliri ijra'iye komitéti yillardin béri xitaydiki kishilik hoquq we buninggha a'it qanun-nizamlarning ijra qilinish ehwalini yéqindin közitip kéliwatqan bolup, her yili bu heqte yilliq doklat élan qilip, amérika prézidénti we dölet mejlisige sunup kelmekte, shundaqla amérika tashqi ishlar ministirliqini xitaydiki kishilik hoquq mesilisini dawamliq otturigha qoyushqa chaqirip kelmekte.