Мишел башелет уйғур районидики зияритиниң чәклимигә учримаслиқи керәкликини тәкитлиди

Мухбиримиз әркин
2019-06-24
Елхәт
Пикир
Share
Принт

Б д т кишилик һоқуқ кеңишиниң 41‏-нөвәтлик йиғини 24‏-июн күни җәнвәдә башланди. Б д т ниң кишилик һоқуқ алий комиссари мишел башелет йиғинниң ечилишида нутуқ сөзләп, уйғур районидики зияритиниң чәклимигә учримаслиқи керәкликини тәкитлиди.

Хитай һөкүмити йеқинда мишел башелетни уйғур районида зиярәттә болушқа тәклип қилған болсиму, лекин у зиярәткә һечқандақ чәклимә қоюлмаслиқи керәклики, зиярәттә өзлириниң халиған җайни тәкшүрәлиши керәкликини билдүргән. Мишел башелет 24‏-июн күни кишилик һоқуқ кеңишиниң 41‏-нөвәтлик йиғининиң ечилиш мурасимида өзиниң юқириқи мәйданини йәнә тәкитлә: «мән хитай һөкүмити билән болған өз ара алақиләрдә шинҗаңға мунасивәтлик ишларни, шундақла башқа мәсилиләрни давамлиқ оттуриға қойимән. Мениң ишханамдикиләрниң шинҗаңда чәклимисиз тәкшүрүш елип бериш һәққидики музакириси давам қилмақта» дегән.

Б д т кишилик һоқуқ кеңишиниң бу нөвәтлик йиғини хитай һөкүмити 2 милйондәк уйғур, қазақ вә райондики башқа мусулман хәлқләрни тутқун қилип, йиғивелиш лагерлириға қамиғанға 2 йилдәк болған бир мәзгилдә башланғаниди. Чәтәл таратқулириниң илгири бәргән учурлирида, хитай һөкүмитиниң әсли бу йиғинда уйғур аптоном райониниң муавин рәиси әркин туниязни сөзлитип, у арқилиқ райондики йиғивелиш лагерлирини ақлашни пиланлаватқанлиқи илгири сүрүлгән. Лекин, хәлқара кишилик һоқуқни көзитиш тәшкилатлириниң 24‏-июн қәйт қилишичә, хитай һөкүмити әркин туниязни сөзләтмәсликни қарар қилған.

Кишилик һоқуқ көзитиш тәшкилати асия бөлүминиң директори софийә ричардсон дүшәнбә күни тветирда елан қилған учурида, «шинҗаңниң муавин рәисиниң 41‏-нөвәтлик кишилик һоқуқ йиғинида сөзлимәйдиғанлиқи» ни билдүргән. Софийә ричардсон учурида буниң сәвәбини чүшәндүрүп: «қариғанда, хитайниң җәнвәдики дипломатик вәкиллири уни сөзлитишниң күткәндәк нәтиҗә бәрмәйдиғанлиқини көргәндәк қилиду» дегән. Йиғин башланған 24‏-июн күни д у қ б д т ниң җәнвәдики баш штаби алдида намайиш өткүзгән.

Толуқ бәт