Mishél bashélét Uyghur rayonidiki ziyaritining cheklimige uchrimasliqi kéreklikini tekitlidi

Muxbirimiz erkin
2019-06-24
Share

B d t kishilik hoquq kéngishining 41‏-nöwetlik yighini 24‏-iyun küni jenwede bashlandi. B d t ning kishilik hoquq aliy komissari mishél bashélét yighinning échilishida nutuq sözlep, Uyghur rayonidiki ziyaritining cheklimige uchrimasliqi kéreklikini tekitlidi.

Xitay hökümiti yéqinda mishél bashélétni Uyghur rayonida ziyarette bolushqa teklip qilghan bolsimu, lékin u ziyaretke héchqandaq cheklime qoyulmasliqi kérekliki, ziyarette özlirining xalighan jayni tekshürelishi kéreklikini bildürgen. Mishél bashélét 24‏-iyun küni kishilik hoquq kéngishining 41‏-nöwetlik yighinining échilish murasimida özining yuqiriqi meydanini yene tekitle: "Men xitay hökümiti bilen bolghan öz ara alaqilerde shinjanggha munasiwetlik ishlarni, shundaqla bashqa mesililerni dawamliq otturigha qoyimen. Méning ishxanamdikilerning shinjangda cheklimisiz tekshürüsh élip bérish heqqidiki muzakirisi dawam qilmaqta" dégen.

B d t kishilik hoquq kéngishining bu nöwetlik yighini xitay hökümiti 2 milyondek Uyghur, qazaq we rayondiki bashqa musulman xelqlerni tutqun qilip, yighiwélish lagérlirigha qamighan'gha 2 yildek bolghan bir mezgilde bashlan'ghanidi. Chet'el taratqulirining ilgiri bergen uchurlirida, xitay hökümitining esli bu yighinda Uyghur aptonom rayonining mu'awin re'isi erkin tuniyazni sözlitip, u arqiliq rayondiki yighiwélish lagérlirini aqlashni pilanlawatqanliqi ilgiri sürülgen. Lékin, xelq'ara kishilik hoquqni közitish teshkilatlirining 24‏-iyun qeyt qilishiche, xitay hökümiti erkin tuniyazni sözletmeslikni qarar qilghan.

Kishilik hoquq közitish teshkilati asiya bölümining diréktori sofiye richardson düshenbe küni twétirda élan qilghan uchurida, "Shinjangning mu'awin re'isining 41‏-nöwetlik kishilik hoquq yighinida sözlimeydighanliqi" ni bildürgen. Sofiye richardson uchurida buning sewebini chüshendürüp: "Qarighanda, xitayning jenwediki diplomatik wekilliri uni sözlitishning kütkendek netije bermeydighanliqini körgendek qilidu" dégen. Yighin bashlan'ghan 24‏-iyun küni d u q b d t ning jenwediki bash shtabi aldida namayish ötküzgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet