Хитай һөкүмити хитайларни уйғур елигә көчүп келишкә вә «йәрликләр» билән той қилишқа чақирмақтикән

Мухбиримиз ирадә
2019-10-29
Елхәт
Пикир
Share
Принт

Хитай һөкүмәт даирилири ичкири өлкиләрдики хитайларни уйғур елигә көчүп келишкә җәлп қилидиған сиясәтләрни очуқ-ашкарә елан қилмақтикән.

Радийомиз хитайчә бөлүминиң хәвәр қилишичә, йеқинда хитайдики иҗтимаий тор бәтләрдә ичкири өлкиләрдин уйғур елигә көчүп берип олтурақлишип қалған хитайлар тәминлинидиған алаһидә имтиязлар һәққидә бир парчә йолланма пәйда болған. 

Униңда илгири сүрүлүшичә, уйғур елидики ишләпчиқириш-қурулуш биңтуәниниң биринчи дивизийәсигә қарашлиқ арал шәһәрлик һөкүмәт ичкири өлкиләрдин келип олтурақлишип қалидиғанларниң 50 мо йәр билән тартуқлинидиғанлиқи һәққидә бир сиясәт бәлгилигән. Униңда йәнә, әгәр көчүп кәлгән киши йәрлик милләтләрдин хотун елип өйләнсә йәнә 50 мо йәр қошуп бериш билән биргә, 70 миң йүән пул билән мукапатлинидиғанлиқи билдүрүлгән. 

Мәлум болушичә, юқиридики бу хәвәр хитайдики тор бәтләрдә зор қизиқиш қозғиған болуп, нурғун тор қолланғучилилар һәтта «милләтләр мәсилисини йилтизидин һәл қилишниң үнүмлүк йоли дәл мушундақ арилаштуруветиштин ибарәт» дегән. 

Хитай һөкүмитиниң уйғур елидә 2 милйон әтрапида кишини аталмиш «тәрбийәләш лагери» ға қамиған билән тәң, уйғур аяллирини хитайларға тегишкә тәшәббус қилидиған сиясәтләрни йолға қоюватқанлиқи көзәткүчиләр алаһидә диққәт қиливатқан йәнә бир муһим мәсилә. 

Уйғур елидә тәкшүрүштә болған америкалиқ антрополог дәррин байлер мушу һәқтә елан қилған бир тәкшүрүш мақалисидә, хитай һөкүмитиниң уйғур әрлирини кәң көләмдә тутқун қилип, той қилиш йешидики уйғур әрлирини җәмийәттин сүпүрүп ташлаш, уйғур әрлирини җәмийәтниң әң төвән қатлимиға чүшүрүш, әксичә хитай әрлирини йошурун пул ярдими, яхши хизмәт пурсити билән тәминләш қатарлиқ суний бәрпа қилинған муһит арқилиқ уйғур аяллириниң хитайларға той қилишини илгири сүрүватқанлиқини вә һәтта қисимән әһвалларда мәҗбурлаватқанлиқини билдүргән. У мақалисидә хитай һөкүмитиниң уйғур елида мәхсус уйғур аяллирини нишан алған җинсийәт сиясити йүргүзүватқанлиқини билдүрүп, буни тарихта тунҗи қетим уйғур аяллириниң дөләт аппаратлириниң җинсий нишаниға айлиниши, дәп көрсәткән.

Пикирләр (0)
Share
Толуқ бәт