Asasiy qatlamlarda Uyghur kadirlar dawamliq zerbe nishani bolmaqtiken

Toqsun nahiyilik tutup turush ornining siyasiy yétekchisi abdulim ableq oghlining toy murasimigha köp adem chaqirghanliqi üchün jazalan'ghan.

Turpan wilayetlik hökümet torining 13-awghust künidiki xewiride bayan qilinishiche, abdulim ableq 2018-yili 10-ayning 3 we 4-künliri oghlining toyini qilip, ikki künde jem'iy 510 ademni toygha teklip qilghanliqi, toy merikisige qatnashqanlar ichide 49 neper saqchi xadimi barliqi we toyda jem'iy 9000 yüen pul chüshkenliki üchün “Intizamgha xilapliq qilish” bilen eyiblinip, omumiy uqturush chiqirilghan. 

Abdulim ableqning oghlining toyi bolup, az kem bir yil bolay dégende jazalinishi diqqet qozghidi. Chet'ellerdiki Uyghur közetküchiler xitay hökümitining asasiy qatlamlarda “Ikki yüzlimichilerni toxtimay qidirip chiqirish” deydighan chaqiriqlar bilen Uyghur kadirlargha dawamliq zerbe bériwatqanliqini bildürdi. Ularning qarishiche, abdulim ableqning oghlining toy merikisini Uyghurlarning örp-adetliri boyiche ötküzüshining jinayet qatarida bir terep qilinishimu alahide diqqet qozghaydiken. 

Yuqiriqi bu xewerdin melum bolushiche, bu qétim turpan wilayiti teweside qurban héyt mezgilide atalmish “Intizamni yene bir qétim tertipke sélip, hoshyarliqni östürüsh” meqsiti bilen abdulim ableq qatarliq 5 neper hökümet kadiri jazalan'ghan bolup, ularning üch nepiri Uyghur iken.