2016-Йили биңтуән 400 миң ишчи қобул қилмақчи

Үрүмчидики “биңтуән гезити” ниң хәвиригә қариғанда уйғурлар дияридики һәрқайси биңтуәнләргә 2016-йили 400 миңдин артуқ әмгәк күчи қобул қилинидиғанлиқи пиланланған болуп, буниң ичидә пахта териш хизмити үчүнла 140 миңдин артуқ әмгәк күчи қобул қилидикән.

Хәвәрдә ейтилишичә, биңтуәнниң санаәт, қурулуш вә мулазимәт түрлири ихтиярлиқ асасида әмгәк күчи қобул қилидиғанлиқини җакарлиған болуп, икки тәрәп оттурисида әмгәк тохтами вә башқа қануний рәсмийәтләр имзалиниду. Оттура техником вә техника мәктәплирини пүттүргәнләр, шундақла һәрбийликтин кәсип алмашқанлар алдин қобул қилинидикән.

Хәвәрдә биңтуәнниң өзиниң һәр йиллиқ әмгәк күч еһтияҗини толуқлаш үчүн хенән, гәнсу, сичүән, шәнши өлкилири вә чуңчиң қатарлиқ шәһәрләр билән узун муддәтлик вә муқим әмгәк күчлирини тәминләш һәмкарлиқи орнатқанлиқи ейтилған.

Ишқа қобул қилинидиғанларниң асасән хитай өлкилиридин болуши уйғур дияридики йиллардин буян давамлишип келиватқан “ошуқчә әмгәк күчлирини ичкиригә йөткәш” долқуниниң йәнә бир тәрипини ашкарилаватқанлиқи мәлум. Чүнки радийомизниң илгирики хәвәрлири вә дуня уйғур қурултийиниң мунасивәтлик доклатлири хитай даирилириниң “ошуқчә әмгәк күчини ичкиридә ишқа орунлаштуруш” дегән намда уйғур яшлирини, болупму яш қизларни мәҗбурий йосунда хитай өлкилиригә әмгәк күчи сүпитидә йөткәватқанлиқини дәлиллигән иди. Әмдиликтә болса “ошуқчә әмгәк күчлири” ниң мәнбәси дәп қариливатқан уйғурлар райониға сирттин көп санда әмгәк күчи қобул қилиш мәсилиниң йәнә бир тәрипини көрсәтмәктә.