2016-Yili bingtu'en 400 ming ishchi qobul qilmaqchi

Ürümchidiki “Bingtu'en géziti” ning xewirige qarighanda Uyghurlar diyaridiki herqaysi bingtu'enlerge 2016-yili 400 mingdin artuq emgek küchi qobul qilinidighanliqi pilanlan'ghan bolup, buning ichide paxta térish xizmiti üchünla 140 mingdin artuq emgek küchi qobul qilidiken.

Xewerde éytilishiche, bingtu'enning sana'et, qurulush we mulazimet türliri ixtiyarliq asasida emgek küchi qobul qilidighanliqini jakarlighan bolup, ikki terep otturisida emgek toxtami we bashqa qanuniy resmiyetler imzalinidu. Ottura téxnikom we téxnika mekteplirini püttürgenler, shundaqla herbiyliktin kesip almashqanlar aldin qobul qilinidiken.

Xewerde bingtu'enning özining her yilliq emgek küch éhtiyajini toluqlash üchün xénen, gensu, sichüen, shenshi ölkiliri we chungching qatarliq sheherler bilen uzun muddetlik we muqim emgek küchlirini teminlesh hemkarliqi ornatqanliqi éytilghan.

Ishqa qobul qilinidighanlarning asasen xitay ölkiliridin bolushi Uyghur diyaridiki yillardin buyan dawamliship kéliwatqan “Oshuqche emgek küchlirini ichkirige yötkesh” dolqunining yene bir teripini ashkarilawatqanliqi melum. Chünki radiyomizning ilgiriki xewerliri we dunya Uyghur qurultiyining munasiwetlik doklatliri xitay da'irilirining “Oshuqche emgek küchini ichkiride ishqa orunlashturush” dégen namda Uyghur yashlirini, bolupmu yash qizlarni mejburiy yosunda xitay ölkilirige emgek küchi süpitide yötkewatqanliqini delilligen idi. Emdilikte bolsa “Oshuqche emgek küchliri” ning menbesi dep qariliwatqan Uyghurlar rayonigha sirttin köp sanda emgek küchi qobul qilish mesilining yene bir teripini körsetmekte.