Уйғур районида биңтуәнниң «үч хил роли» күчәйтилгән

Мухбиримиз җәвлан
2020-09-23
Елхәт
Пикир
Share
Принт

Хитайчә «шинҗаң гезити» ториниң 23-сентәбир елан қилған бир хәвиридә биңтуәнниң тәрәққияти мәхсус тонуштурулған болуп, буниң хитай компартийәсиниң уйғур районида йүргүзгән мувәппәқийәтлик сияситиниң нәтиҗиси икәнлики алаһидә тәкитләнгән.

Хәвәрдә хитай компартийәсиниң баш секретари ши җинпиңниң уйғур районини көздин кәчүргәндә ейтқан «биңтуәнниң мәвҗутлуқи вә тәрәққиятиға һәргиз сәл қарашқа болмайду, бәлки уни узақ муддәтлик, улуғ нишан қилиш керәк. Йеңи вәзийәттә биңтуәнниң хизмитини күчәйтишкә болидуки, аҗизлаштурушқа болмайду,» дегән сөзи муһим йолйоруқ сүпитидә көрситилгән. «2-Қетимлиқ шинҗаң хизмәт йиғини» дин кейин хитай компартийәси мәркизий һөкүмитиниң биңтуәндин «муқимлиқни сақлаш, иттипақлиқни сақлаш, тәрәққиятни сақлаш» тәк үч хил ролини техиму күчәйтишни тәләп қилғанлиқи, биңтуәнниңму бу чақириққа аваз қошуп йиллардин бери өз көлимини кеңәйтип, тәсирини күчәйтип кәлгәнлики тәшвиқ қилинған.

Бу хәвәрдә алаһидә диққәт қозғайдиған нуқта шуки, биңтуәндики хитайлар «иттипақлиқ вә тәрәққият» тәлипи бойичә, әтрапидики уйғур аһалиләргә көпләп ярдәм бериш вә уларни қизиқтуруш арқилиқ өз тәвәликигә өткүзүп тәсир даирисини чоңайтқан. Биңтуән тәшвиқат орунлири адәм тәшкилләп, намрат аһалиләрни йоқлап, қийинчилиқи болса һәл қилип «партийәниң иллиқлиқи» ни йәткүзүш билән биргә, уларни биңтуәнгә қетилишниң пайдиси тоғрилиқ ашкара тәшвиқат елип барған.

Мәлуматларға қариғанда, уйғур районидики терилғу йәр, су вә кан байлиқиниң мутләқ көп қисмини игиливалған биңтуән хитай мәркизий һөкүмитигә биваситә қарайдикән. Бу хәвәрдә биңтуәнниң йеқинқи йиллардин буян ғайәт зор тәрәққиятларға еришкәнлики, 2019-йилдики ишләпчиқириш омумий қиммитини 274 милярд 700 милйон йүәнгә йәткүзүп, 2014-йилдикидин 100 милярд йүән ашурғанлиқи, өткән йилниң ахирида шихо наһийәсигә қошна җайда хуяңхе дегән наһийә дәриҗилик бир шәһәрни қуруп чиққанлиқи, шуниң билән биңтуәнгә биваситә қарашлиқ наһийә дәриҗилик шәһәрниң 10 ға йәткәнлики көрситилгән.

Пикирләр (0)
Share
Толуқ бәт